Փաստ ինֆո

Մեզ մեղադրում եք այն բանի մեջ, որ վերցրել ենք Սերժ Սարգսյանի կոստյումը և 2 կոճակ ենք կտրել , դուք նկատի ունեք գյուղատնտեսության և մշակույթի նախարարությունները՞, իրականում դուք հոգու խորքում այդ նախարարություններին վերաբերում եք որպես կոստյումի 2 կոճա՞կ, սա էլ երևի թե կարելի է համարել նույն ոճով, ինչ ոճով դուք եք ներկայացնում ու խոսում: Այսօր Ազգային ժողովում հայտարարեց Արդարադատության նախարար Արտակ Զեյնալյանը՝ անդրադառնալով ‹‹Լուսավոր Հայաստան›› խմբակցության ղեկավար Էդմոն Մարուքյանի նախօրեին հնչեցված քննադատությանը:

Հիշեցնենք, որ երեկ «Կառավարության կառուցվածքի և գործունեության մասին» օրենքում փոփոխություններ և լրացումներ կատարելու մասին օրենքների նախագծերի փաթեթի քննարկման Մարուքյանը հայտարարել էր, որ իշխանությունը հանել է Սերժ Սարգսյանի կոստյումի կոճակներն ու հագնելով այն ասում է, որ լավ կոստյում է: Նա նաև իր հետ բերել էր կառավարության կառուցվածքի իր տարբերակը, իսկ իշխանության ներկայացրած տարբերակը որակել էր քաոս և խայտառակություն՝ նշելով, որ իշխանությունը ետ է գալու՝ այն փոխելու, բայց ուշ է լինելու:

Արդարադատության նախարարն ի պատասխան նշեց, որ նախագիծը չի հենվում հետազոտությունների և վերլուծությունների, կարիքների գնահատման վրա: «Ձեր կառուցվածքը ևս կարող է աշխատել, սակայն այլ իրավիճակում››,-ասաց նախարարը:
Անդրադառնալով ազգային անվտանգության ծառայությունը և ոստիկանությունը նախարարություններ դարձնելուն վարչապետի խոստմանը՝ Զենյալյանն ասաց, որ կարծիքի ազատության իրավունքը ներառում է նաև կարծիքը փոխելու իրավունքը և այդ կարծիքը կամայական կամ կամակոր ձևով չի ներկայացվել, այլ հենվել է կոնկրետ փաստական հանգամանքների և իրողություններ, համադրությունների վրա:

‹‹Հանգամանքների փոփոխության պատճառով կարող է ձևավորվել նաև այլ կարծիք: Մենք սրանով հաստատում ենք մեր ժողովրդական լինելն ու կոլեգիալ կառավարումով առաջնորդվել պատրաստակամությունը››,-ասաց արդարադատության նախարարը:

Նա նշեց, որ պատգամավորների համար միակ գործիքակազմը հարց ու պատասխանը չէ. պատգամավորը կարող է գրավոր հարցումներ ուղղել, հարցապնդումներ անել, նախաձեռնել լսումներ կամ հրավիրել խմբակցություն:

‹‹Այսօր ԶԼՄ-ները անհամեմատ ազատ են և կարող է օգտագործվել դրանց ռեսուրսները: Կարող է պատգամավորը հեղինակել Սահմանադրական դատարանի գանգատ կամ դիմում ներկայացնել Վարչական դատարան՝ վիճարկելով գործադիրի նորմատիվ ակտերը››,-ասաց Զենյալյանը:

‹‹Բարգավաճ Հայաստան›› խմբակցության պատգամավոր Գևորգ Պետրոսյանը, ընդհատելով նախարարի խոսքն ասաց, որ չկա նման բան, Զեյնալյանն էլ, իր հերթին, ասաց ՝ ինքը բազմիցս դիմում է ներկայացրել Վարչական դատարան և խնդիրը ընդամենը պատգամավորների անտեղյակությունն է:

Հեղինակ` Սոնա Գեւորգյան