Փաստ ինֆո

Էջմիածին քաղաքում  81-ամյա տղամարդու սպանության գործով մեղադրանք է առաջադրվել  օրերս ձերբակալված տղամարդուն՝ 1971 թվականին ծնված Ղ. Մ.-ին։ Այս մասին «Փաստինֆո»-ին տեղեկացրեց Դատախազության հանրային կապերի բաժնի պետ Արեւիկ Խաչատրյանը։

Վերջինիս խոսքով՝ նրան մեղադրանք է առաջադրվել 104-րդ հոդվածի 2-րդ մասի 8-րդ կետով, այն է՝ ավազակությամբ զուգորդված սպանությունը։ Միջնորդություն է ներկայացվել նրա նկատմամբ խափանման միջոց կալանավորումը ընտրելու համար, ինչն էլ բավարարվել է։ 

Արդեն հաղորդել ենք, որ երեկ՝ ապրիլի 18-ին, կալանավորվել է նաեւ սպանությանն օժանդակելու մեջ մեղադրվող երիտասարդ աղջիկը։

81-ամյա տղամարդու սպանության գործով երիտասարդ աղջիկը կալանավորվեց

Սպանությունը տեղի է ունեցել ապրիլի 12-ին ժամը 21:00-ից մինչև 23:30-ն ընկած ժամանակահատվածում, իսկ դիակը հայտնաբերվել է հաջորդ օրը՝ ապրիլի 13-ին՝ ձեռքերն ու ոտքերը ժապավենով կապած, գլխին` բռնության հետքերով։

Զոհի տունն ու խանութն ամբողջությամբ տակնուվրա է եղել արված։ Հափշտակվել էր նաեւ տուժողի «Lexus RX300» մակնիշի ավտոմեքենան, որը հետագայում հայտնաբերվել է Դիլիջանում։ «Փաստինֆո»-ն հաղորդել էր, որ կատարվածից հետո աղջիկը փորձել էր գողացված մեքենայով իր ազգականներից մեկի հետ փախուստի դիմել, սակայն Դիլիջանի ոլորաններում տեղի էր ունեցել ՃՏՊ, ինչի հետևանքով ավտոմեքենան գլորվել էր ձորը։ Մեքենայի համարները պատահարի ժամանակ փոխված էին:

Նշենք, որ աղջկա ազգականը հիվանդանոցում է, եւ գործով որևէ կարգավիճակ այս պահին չունի։

Հեղինակ` Միլենա Խաչիկյան