Փաստ ինֆո

«Մեր ընկալմամբ՝ սահմանադրական կարգի տապալմանը վերաբերող նոր օրենքը ոչ մի դեպքում պատասխանատվությունը խստացնող չէ»։ Այսօր այս մասին լրագրողների հետ զրույցում հայտարարել է ՀՀ գլխավոր դատախազ Արթուր Դավթյանը։

Անդրադառնալով Ռոբերտ Քոչարյանի պաշտպանական կողմի այն խոսքերին, թե 2009 թվականին դատախազը որոշում է կայացրել այն ժամանակ գործող 300 հոդվածով քրեական հետապնդում չիրականացնել Մարտի 1-ի գործով 7 հոգու նկատմամբ՝ այն պատճառաբանությամբ, որ օրենսդրական փոփոխության արդյունքում այսօր արդեն հայտնի 300.1 հոդվածը դիտարկվել է պատասխանատվությունը խստացնող օրենք, Արթուր Դավթյանն ասաց. «Առիթի դեպքում այդ որոշումը կներայացվի, եւ կտեսնեք, որ այդ որոշման մեջ որեւէ մեկնաբանություն եւ բացատրություն չկա»։

Գլխավոր դատախազը ընդգծեց նաեւ, որ իրավական մեկնաբանությունը աքսիոմա չէ, որ փոփոխման ենթակա չլինի. «Եթե նույնիսկ տրված լիներ որեւէ մեկնաբանություն, այն հետագայում կարող էր փոխվել։ Այսօր նույնիսկ Վճռաբեկ դատարանը, որ երաշխավորն է մեր երկրում իրավական որոշակիության ապահովման, պարբերաբար նույն նորմի որոշումներ ու դիրքորոշումներ է փոխում»։ Նրա խոսքով՝ գործող իրավակարգավորումների շրջանակում այսօր էլ ստորադաս դատախազը կարող է մի դիրքորոշում ունենալ, վերադասը՝ մեկ այլ։

Անդրադառնալով Ռոբերտ Քոչարյանի պաշտպանական կողմի այն հայտարարությանը, թե այդ դեպքում ինչու չեն վերաբացվում Մարտի 1-ի գործով այդ 7 հոգու գործերը՝ Արթուր Դավթյանն ընդգծեց, որ անհիմն կամ անօրինական հետապնդում չիրականացնելու որոշումները կարող են վերանայվել բացառապես գլխավոր դատախազի կողմից բացառապես վեցամսյա ժամկետում, իսկ դրանից անցել է ինը տարի. «Այսինքն՝ վերանայման հնարավոր դատավարական ժամկետներն անցել են»։

Լրագրողների այն հարցին, թե հնարավո՞ր է, որ վարչապետի գործը եւս վերանայվի, գլխավոր դատախազը պատասխանեց. «Նախկինում կայացված դատական ակտերում առկա փաստական տվյալները համադրվում են նոր տվյալների հետ և երբ որ օրենքի տառին համապատասխան նոր երևան եկած հանգամանքներով վարույթներ իրականացնելու անհրաժեշտություն տեսնենք, անկախ նրանից՝ ով է նա, կիրականացվի»:

Աղբյուր` Փաստինֆո