Փաստ ինֆո

«Կառավարությունն օրական տասնյակ որոշումներ է ընդունում։ Ի՞նչ է տնտեսվարող սուբյեկտներս  պետք է դատարաններո՞վ ստիպենք, որ ՊԵԿ-ը Կառավարության որոշումը կատարի», - «Տարոն» բաց բաժնետիրական ընկերության տնօրեն Հայկ Իսախանյանի խոսքով արդեն 22 տարի է, ինչ պայքարում են  պետեկամուտների կոմիտեի  անօրինականությունների դեմ։ Եղեգնաձորի տրիկոտաժի կոմբինատի ամբողջ գույքը, դրամարկղն ու շենքը տարիներ շարունակ  կալանքի տակ են։ Գանձման որոշումը  կայացվել է 1992 թվականին գոյացված պարտքի վերաբերյալ, որն արտացոլված չէ ընկերության մասնավորեցման փաթեթում։  «Տարոն» ԲԲԸ-ի պարտավորությունները պետբյուջեի նկատմամբ կազմում է 33.834.554 դրամ։

«Փաստինֆո»-ի հետ զրույցում ընկերության տնօրենն ասաց, որ եթե Կառավարությունը ցանկանա, կարող է ուսումնասիրել խնդիրները, լսի երկու կողմերին և փորձի լուծում տալ, - «Տասնյակ նամակներ եմ ուղարկել նախկին և ներկայիս իշխանություններին, սակայն անարդյունք։ Ոչ ոք չի ցանկանում ՊԵԿ-ի հետ ինչ-որ հարց լուծել։ Երևի նրանց ձեռք է տալիս, որ  պետբյուջեն լցնում են ՝ անօրինական ձևով տնտեսությունից քամելով։ Վարչապետը փոխվեց, բայց վարչարարությունը՝ ոչ »։

ՊԵԿ-ն ու Կառավարությունը կարծես կանխամտածված փոշիացրեցին  300 բաժնետեր ունեցող ձեռնարկությունը, որը կարող է ապահովել 500 աշխատատեղ, -«Եղեգնաձորում այսօր 100 աշխատող էլ չեք գտնի, բայց եթե ընկերությունն այդքան բանվոր էլ ունենա, համայնքին մեծ օգուտ կլինի»։ «Տարոն» ԲԲԸ-ի տնօրեն Հայկ Իսախանյանը  նաև ասաց, որ ցանկություն կա վերականգնելու ձեռքի գորգերի արտադրությունը, որը կապված չէ նոր սարքավորումների հետ, - «Եթե հաջողվի թողարկել ձեռքի գորգը, նույնիսկ հեռու գյուղերում ցանկության դեպքում մարդիկ  կարող են ընտանիքներով աշխատել։ Դա դեռ երազանք է»։ 22 տարիների ընթացքում մասնակցել են մոտ 600 դատական գործընթացի, փորձել պահպանել դրությունը։ Հայկ Իսախանյանի խոսքով երեք անգամ իրենց քննարկման են կանչել  Ազգային ժողով, բայց  եթե այնտեղ էլ իրենց հարցին լուծում չտան, կդիմեն ՄԻԵԴ, - «Նույնիսկ մտածել ենք Եղեգնաձորի ճանապարհը փակել։ Ցանկացած տհաճություն անցել է մտքներովս, բայց ինչ անենք։ Բոլորը դա են անում, մենք էլ պետք է անենք»։

Լուսանկարը՝ A1+  կայքից

Հեղինակ` Հասմիկ Կոշկարյան