Փաստ ինֆո

ՀՀ վարչապետ Նիկոլ Փաշինյանի Ստրասբուրգյան այցի ժամանակ  հայտարարած 51 հազար աշխատատեղերի մասին տեղեկությունը գրավեց բոլորի ուշադրությունը։ Շատերին էր հուզում այն հարցը, արդյոք  հնարավո՞ր է 10 ամսվա ընթացքում ստեղծել նման թվաքանակով աշխատատեղեր և որտեղ են դրանք։ Իրականում այդ աշխատատեղերը եղել են, սակայն գրանցված չեն եղել։ Այսինքն՝ խոսքը չի գնում նոր աշխատատեղերի ստեղծման մասին։

Ըստ պաշտոնական վիճակագրական տվյալների՝ նախորդ տարվա հունվարի համեմատ, այս տարվա հունվարին գրանցված ախատատեղերի քանակն ավելացել է 51 հազարով, սակայն սա ըստ երևույթին ստվերից դուրս եկածների թիվն է։ Դրանց մեծ մասը դեռ նախորդ տարվա փետրվար-մարտ-ապրիլ ամիսներին է գրանցված եղել։ Նկատենք, որ պաշտոնական վիճակագրական տվյալների համաձայն՝ 2019 թ. հունվարին նկատվել է աշխատեղերի նվազում՝ 2018թ. դեկտեմբերին գրանցված է եղել  585.3 հազար աշխատատեղ, իսկ այս տարվա հունվարին՝ 560.6 հազար, այսինքն մեկ ամսվա ընթացքում աշխատատեղերը պակասել են  25 հազարով։

Փորձեցինք ուսումնասիրել նաեւ պաշտոնական վիճակագրությունը՝  աշխատուժի պահանջարկի՝ ըստ  տնտեսական  գործունեության տեսակների, աշխատանքի տեղավորվածների, պաշտոնաապես գրանցված գործազուրկների միջին ամսական թվաքանակի վերաբերյալ։

Այսպես՝ այս տարվա հունվարի դրությամբ պետական հատվածում աշխատուժի պահանջարկը նախորդ տարվա հունվարի համեմատ նվազել է 15 %-ով, իսկ ոչ պետական սեկտորում աճել 15 %-ով։ 2019 թվականի հունվար-փետրվար ամիսներին աշխատանքի է տեղավորվել 1451 մարդ, մինչդեռ 2018 թվականի հունվար-փետրվար ամիսներին այս թիվը հասնում էր 1553-ի։ Այսինքն տարեսկզբին աշխատանքի ընդունվածները 102-ով քիչ են նախորդ տարվա նույն ժամանակահատվածի համեմատ։ Իսկ աշխատուժի պահանջարկի՝ ըստ  տնտեսական  գործունեության տեսակների վերաբերյալ վիճակագրության համաձայն՝ այս տարվա հունվար-փետրվար ամիսներին ստեղծվել է 4 նոր աշխատատեղ, իսկ 2018 թվականին՝ մոտ  298։

Նիկոլ Փաշինյանը Ստրասբուրգում հայ համայնքի ներկայացուցիչների հետ հանդիպման ժամանակ ասել է հետևյալը,- «Աշխարհի պատմության մեջ դուք չեք գտնի երկրորդ դեպք, երբ երկրում տեղի է ունեցել հեղափոխություն, և դրան չի հաջորդել տնտեսական փլուզում։ Ռեսեցիա չի հաջորդել դրան, և մենք հիմա տնտեսական աճի ցուցանիշի մեջ ենք։ 10 ամսվա ընթացքում Հայաստանի Հանրապետությունում աշխատատեղերի թիվն ավելացել է 51 հազարով։ Դա աշխատաշուկայի ընդհանուր 10 տոկոսն է։ Մենք, իհարկե, այսօր չենք կարող վստահ ասել, թե այդ աշխատատեղերի որ մասն է զրոյից ստեղծվել, որ մասը ստվերից դուրս է եկել, բայց եթե նույնիսկ ամբողջն է ստվերից դուրս եկել, դա աննախադեպ հաջողություն է»։

Հեղինակ` Հասմիկ Կոշկարյան