Փաստ ինֆո

«Բարգավաճ Հայաստան» խմբակցության ղեկավար Գագիկ Ծառուկյանի կարծիքով «Արարատ ցեմենտ» գործարանի շուրջ տեղի ունեցող իրադարձությունները ինչ-որ մեկի անձնական շահերի արդյունքն է։

Հիշեցնենք, որ աշխատանքից ազատման ծանուցագրեր ստացած «Արարատցեմենտի» աշխատակիցներն արդեն մի քանի օր է, ինչ բողոքի ակցիա են իրականացնում։

«Հիմնական պատճառը հանձնաժողովն է։ Խնդիրը քննարկվել էր Էկոնոմիկայի նախարարի հետ և որոշվել էր տուրք սահմանել ներկրվող ցեմենտի վրա։ Մենք էլ մեր կողմից 50 հազար դրամը սարքել էինք 40 հազար դրամ, որ պահանջարկը մեծ լինի, իսկ այսօր, չգիտեմ՝ ով, ինչ անձնական շահերից ելնելով, հանձնաժողովում (տնտեսական հարցերի մշտական հանձնաժողով -խմբ.) որոշում է՝ թող էդքան ընտանիք չաշխատի, կլինկերի (ցեմենտի հումքի) վրա տուրք չդրվի։ Հենց կլինկերը ցեմենտի հիմնական մասն է, որը ծասխերի 90 տոկոսն է», - այսօր Ազգային ժողովում լրագրողների հետ ճեպազրույցում հայտարարեց Գագիկ Ծառուկյանը՝ նշելով, որ նման առաջարկ ներկայացնողները անձնական շահեր են հետապնդում։

«Պրովոկատորներ են ուղարկում ցեմենտի գործարան, որ նրանք ընդհանրապես գործ չունեն։ Ասում են՝ ինչի ես եկել, ասում է՝ եկել եմ ցեմենտի գործարանի աշխատողների շահերը պաշտպանեմ։ Ցեմենտի գործարանի աշխատողի շահերը, համապատասխան, վարչապետը պաշտպանում ա, սեփականատերը պաշտպանում ա, պետք է միայն պահանջվի հանձնաժողովի նախագահից, որ սա անընդունելի ա։ Եթե այսօր հանձնաժողովը որոշում է կայացրել, որ պետք է կլինկերը հարկվի, հիմա մենք ցեմենտ չենք արտադրի, ո՞րն է խնդիրը։ Կառավարությունը հանձնարարել ա, հարցը լուծված ա, թե ինչ փոխվեց հանձնաժողովում, ներկա կլինեք, կտեսնեք քննարկումները», - նշեց Ծառուկյանը՝ ընդգծելով, որ իրենք որոշ ընդառաջ քայլեր են կատարել՝ նպաստելու երկրում տնտեսական հեղափոխությանը։

Աղբյուր` Փաստինֆո