Փաստ ինֆո

ԱԺ ընդդիմադիր խմբակցությունների ներկայացրած օրենսդրական նախաձեռնություններն այսօր մեծամասնության կողմից մերժվեցին և չմտան լիագումար նիստի օրակարգ։

Նշենք, որ թե  «Լուսավոր Հայաստանի» և թե «Բարգավաճ Հայաստանի» օրենսդրական նախաձեռնությունները ԱԺ մշտական հանձնաժողովներում քննարկման ժամանակ բացասական եզրակացություն էին ստացել։ Նաիրա Զոհրաբյանը եւ Էդմոնդ Մարուքյանը շատ կտրուկ արձագանքեցին։

ԱԺ ամբիոնից ԲՀԿ-ական Նաիրա Զոհրաբյանը հայտարարեց, որ իշխանության գործողություններին առարկություն ներկայացնելու համար «մի ճտտոցով» հրահանգ է տրվում սոցիալական ցանցերում հարձակում գործել ընդդիմության ներկայացուցիչների վրա. «Ասում են, թե հեղափոխության դեմ պայքար է սկսվել, հեղափոխությունը միայն ձերը չի, մի սեփականաշնորհեք հեղափոխությունը, մի փորձեք մեր հանրությանը դարձնել ամբոխ, սոցիալական ցանցերում զոմբիական հրաման տալ՝ զոմբիի նման հարձակվեք։ Ի՞նչ ենք ասում, ադեկվատ, նորմալ նախագիծ է։ Ասում ենք քննարկենք, սա այն հարթակն է, որտեղ պետք է քննարկել, բանավիճել, միգուցե դուք մեզ համոզեք, որ մենք սխալ ենք, բայց էսպես իմպերատիվ կերպով դակել, ասել՝ ոչ ու գնալ առաջ, ինձ մոտ արթնացնում է շատ վատ հիշողություններ»։

«Լուսավոր Հայաստան» խմբակցության ղեկավար ղեկավար Էդմոն Մարուքյանը եւս նկատեց, որ խորհրդարանական մեծամասնությունը կարող էր քվեարկությամբ ընդգրկել նախագծերը լիագումար նիստի օրակարգ, քննարկել, հետո միայն որոշում կայացնել։

«Քննարկենք, ապացուցեք, որ լավը չի, պոպուլիզմ ա։ Վերջին հաշվով, մամուլում էլ է գրվել, պառլամենտը պարապության է մատնվել, կառավարությունը չի գեներացնում նախագծեր, պատգամավորների նախագծերն էլ մերժվում են, չեն թողնում որ քննարկվեն։ Ինչո՞վ ենք մենք զբաղված», - ասաց Մարուքյանն՝ ընդգծելով, որ քննարկումները կարող են նոր խնդիրների լուծումներ բերել։

Աղբյուր` Փաստինֆո