Փաստ ինֆո

2018 թվականի մայիսին խորհրդարանում Նիկոլ Փաշինյանը հայտարարել է, որ ԱԱԾ-ն ու ոստիկանությունը պետք է դառնան նախարարություններ, սակայն առ այսօր այդ խոստումը չի կատարել։ Այս մասին այսօր Ազգային ժողովի Պետական-իրավական հարցերի մշտական հանձնաժողովում հայտարարեց ԱԺ «Լուսավոր Հայաստան» խմբակցության ղեկավար Էդմոն Մարուքյանը՝ «Քաղաքացիական պայմանագիր» կուսակցության վարչության անդամ, ԱԺ «Իմ քայլի» պատգամավոր Վահագն Հովակիմյանից փորձելով պարզել պատճառը։ Նշենք, որ հանձնաժողովի նիստում քննարկվել է Կառավարության կառուցվածքի ու գործունեության մասին օրինագիծը։

«Նիկոլ Փաշինյանը մայիսի 1-ին կամ 8-ին խորհրդարանում ունեցած իր ելությում՝ պատասխանելով պատգամավորի հարցին, ասաց, որ ԱԱԾ-ն ու ոստիկանությունը պետք է դառնան նախարարություններ։ Մենք մեկ տարի է՝ սպասում ենք այս նախագծին, և ես ուզում եմ ձեր կարծիքն իմանալ՝ ո՞րն է պատճառը, որ վարչապետի խոստումը չեք կատարում, որպես իշխող ուժի վարչության անդամ, արդյոք մի՞տք է փոխվել խոստումից հետո, եթե այո, ի՞նչ ճնշման արդյունքում չեք կատարում այդ խոստումը։ Քաղաքական ի՞նչ հետևանք կարող է լինել տրված խոստումը չկատարելու իմաստով, այսինքն՝ հնարավո՞ր է մյուս խոստումներն էլ չկատարվեն»,- դիմելով Վահագն Հովակիմյանին ասել է Էդմոն Մարուքյանը։

Ի պատասխան Հովակիմյանն ասաց, որ կառավարությունն ինքն է որոշում՝ ինչ կառուցվածքի վերաբերյալ նախագիծ ներկայացնի Ազգային ժողով։

«Կառավարությունն ինքն է ցանկանում նման կառուցվածք ունենալ և դրա համար էլ այսպիսի նախագիծ է ներկայացրել։ Տվյալ դեպքում կառավարությունը եկել է այն համոզման, որ այս փուլում իր ծրագիրն իրականացնելու համար նման կառուցվածք է անհրաժեշտ։ Կառավարությունը կարող է հետագայում փոփոխություններ նախաձեռնել, բայց հիմա ներկայացրել է այնպիսի կառուցվածք, որպիսին իրեն անհրաժեշտ է»։ Այս պատասխանը չգոհացրեց Մարուքյանին։

«Ես չեմ վիճարկում կառավարության մենաշնորհը կառուցվածքը ներկայացնելու հարցում։ Ես հետաքրքրվում էի՝ որպես իշխող վարչության անդամ, թեկնածու Փաշինյանը ԱԺ ամբիոնից խոսք է տվել, որ ԱԱԾ-ն և ոստիկանությունը դառնալու են նախարարություններ, հիմա այդ խոստումը չի կատարվել ձեր ուժի կողմից, ինչո՞ւ չի կատարվել, ինչ-որ բա՞ն է ազդել և արդյոք դա չի ազդի ընդհանրապես հավատալու իմաստով։ Այն մարդը, որը խոստում է տվել, կառավարության ղեկավարն է»,- արձագանքեց Մարուքյանը, իսկ Վահագն Հովակիմյանն էլ հորդորեց այդ հարցը տալ վարչապետին։
«Էդ հարցը դուք հնարավորություն ունեք տալու վարչապետին, և ես համոզված եմ, որ պատասխանը ձեզ լիարժեք կբավարարի և դուք անբավարարվածության զգացողություն չեք ունենա, հաստատ դրանից հետո ամեն ինչ բավարարված կլինի»։

Աղբյուր` Փաստինֆո