Փաստ ինֆո

Էջմիածնում 81-ամյա տղամարդը դարձել է ավազակության զոհ. նրա գլխին հասցվել է 5 հարված։ Այս մասին «Փաստինֆո»-ն տեղեկացավ ՀՀ քննչական կոմիտեից։

Ավելի վաղ տեղեկացրել ենք, որ ապրիլի 13-ին Էջմիածնում հայտնաբերվել է տարեց տղամարդու դի՝ բռնության հետքերով։ Դատախազությունից «Փաստինֆո»-ին հայտնել էին, որ սպանությունը բացահայտվել է եւ ենթադրյալ կատարողները երկուսն են՝ 1990թ. ծնված Էջմիածնի բնակչուհին, իսկ  մյուսը՝ Արարատի մարզի բնակիչ՝ ծնված 1971թ.։

Քիչ առաջ դեպքի վերաբերյալ հաղորդագրություն է տարածել նաեւ Քննչական կոմիտեն, որտեղ մասնավորապես ասվում է.

Ձերբակալվել են տարեց տղամարդու սպանությունը ենթադրյալ կատարած անձինք. նրանցից մեկը երիտասարդ աղջիկ է

«2019թ. ապրիլի 13-ին՝ ժամը 18:30-ին, Էջմիածին քաղաքի բնակչից ոստիկանության Վաղարշապատի բաժնում հաղորդում է ստացվել այն մասին, որ վերջինս չի կարողանում կապ հաստատել իր կնոջ հոր` նույն քաղաքի՝ 1938թ. ծնված բնակչի հետ:

Ձեռնարկված անհրաժեշտ միջոցառումների արդյունքում պարզվել է, որ Էջմիածին քաղաքի 81-ամյա բնակիչը դարձել է սպանության զոհ:

Նախնական տվյալներով՝  2019թ. ապրիլի 12-ին՝ ժամը 21:00-ից մինչև 23:30-ն ընկած ժամանակահատվածում, ենթադրյալ հանցագործություն կատարած անձինք, ավազակությամբ զուգորդված, 81-ամյա տղամարդուն կյանքից ապօրինաբար զրկելու նպատակով, մուտք են գործել Էջմիածին քաղաքի Մաշտոց փողոցում գտնվող շենքի բնակարաններից մեկը, վերջինիս կապել են կպչուն ժապավենով, գույքը հափշտակելու նպատակով խառնել տան իրերը, այնուհետև՝ բութ, կոշտ առարկայով շուրջ հինգ հարված հասցրել նրա՝ կենսական օրգան հանդիսացող գլխի շրջանում: Արդյունքում՝ Էջմիածին քաղաքի 81-ամյա բնակիչը մահացել է:

Էջմիածնում 81-ամյա տղամարդն սպանվել է շահադիտական դրդումներով. հարուցվել է քրեական գործ

Իրենց հանցավոր մտադրությունը շարունակելու նպատակով նույն անձինք մուտք են գործել նույն փողոցում գտնվող, 81-ամյա տղամարդուն պատկանող կոնյակի խանութ, այնուհետև վերջինիս ավտոտնակից հափշտակել են նրան պատկանող «Lexus RX 330» մակնիշի ավտոմեքենան:

Դեպքի առթիվ 2019թ. ապրիլի 13-ին ՀՀ քննչական կոմիտեի Արմավիրի մարզային քննչական վարչության Վաղարշապատի քննչական բաժնում հարուցվել է քրեական գործ՝ ՀՀ քրեական օրենսգրքի 104-րդ հոդվածի 2-րդ մասի 8-րդ կետով:

Քրեական գործով ձեռնարկված անհետաձգելի քննչական գործողությունների և օպերատիվ հետախուզական միջոցառումների արդյունքում պարզվել է ենթադրյալ հանցագործություն կատարած անձանց ինքնությունը, նրանցից մեկը Էջմիածին քաղաքի բնակչուհի է՝ ծնված 1990թ., մյուսը՝ Արարատի մարզի բնակիչ՝ ծնված 1971թ.: Վերջիններս ձերբակալվել են՝ ավազակությամբ զուգորդված սպանություն կատարելու կասկածանքով:

 Նախաքննությունը շարունակվում է»:

Աղբյուր` Փաստինֆո