Փաստ ինֆո

Բարգավաճ Հայաստան կուսակցության ղեկավար Գագիկ Ծառուկյանին խեղճացնելու քաղաքականությունը  փոփոխության չի ենթարկվել. Այս գիծը պահպանջում է թավշյա հեղափոխության առաջնորդի իշխանության գալու հենց առաջին օրերից։ Իշխանությունները իրենց ձեռքում են պահում մի քանի լծակ՝ անհրաժեշտության դեպքում գործի դնելու համար, որի պատկերավոր վկայությունը Աբովյան փողոցում գտնվող կիսակառույց Կեմպինսկի հյուրանոցի ոդիսականի շարունակությունն է:

Ասում ենք շարունակություն, քանի որ այս առումով նախորդ և ներկա իշխանությունները նույն քաղաքական գիծն են տանում: Այս առումով որքան էլ Երևանի քաղաքային իշխանությունները հայտարարեն, թե  կիսակառույցները ավարտին հասցնելու քաղաքականություն են վարում, այս մեկը, թերևս,  դուրս մնա այդ քաղաքականությունից: Քանի որ այս հարցում կոնսեսուսի չգալով ցանկացած ժամանակ հանրապետության վարչապետի  իշխանությունն այն փորձելու է օգտագործել Ծառուկյանի դեմ: Հիշեցնենք, որ 2018-թ նոյեմբերին Աբովյան 5/1, 5/2 և 5/5 հասցեներում իրականացվող շինարարությունը կասեցվել է՝ քաղաքաշինական փաստաթղթերի ուսումնասիրման նպատակով, այն համատեքստում, որ Երևանում շինարարության թույլտվություն ստանալու համար անհրաժեշտ է նախագիծը միջանկյալ համաձայնեցնել ՀՀ ԱԻՆ աշխատակազմի պետական հրդեհային և տեխնիկական անվտանգության տեսչության, ինչպես նաև ՀՀ մշակույթի նախարարության հետ և նրանց եզրակացություններն ստանալուց հետո միայն կարելի է շինթույլտվություն ակնկալել Երևանի քաղաքապետարանից:

Իհարկե, էնպես չի, որ առյուծակերպ  խորհրդանիշերի ներքո իր բիզնես  գործունեությունն իրականացնող Ծառուկյանը մի օր չի կարող կատաղել, բայց որ այսօր կողմերը նյարդերի պատերազմի մեջ են ակնհայտ է:  Դրա հանրային դրսեւորումն արձանագրվեց տրանսգենդերի ելույթի շուրջ, բայց ստվերայինը «Պարտեզ» ռեստորանի մոտ տեղի ունեցած սպանություններն են։ Հիշեցնենք, որ ռեստորանի մոտ տեղի ունեցած զինված հարձակման կողմերը պայմանական ասված Ծառուկյանի թիկնազորի համարում ունեցող անձինք էին, իսկ մյուս կողմում ԱԺ նախկին պատգամավոր Մելիք Մանուկյանի զարմիկներն ու ընկերները։ Արդյունքում՝ երկու երիտասարդ սպանվեց, որի համար որեւէ մեկին մեղադրանք դեռ չի առաջադրվել։ Գործով շուրջ 20 մեղադրյալ կա, որոնց թվում են նաեւ Ծառուկյանի որդու հետ առնչություն ունեցող դերակատարները, բայց տեղեկություններ կան, որ Մանուկյանի զարմիկներից  «հաշիվ» պահանջելը համաձայնեցվել էր Ծառուկյանի որդու հետ, վերջինս հարցաքննվեց, բայց դատավարական կարգավիճակ չստացավ։ Իշխանությունները փորձում են նրան բերել իրավական դաշտ, իսկ Ծառուկյան ավագն ընդդիմանում է եւ հասկացնում, որ կտեղափոխի ընդդիմադիր դաշտ։ Դե իսկ իշխանական լծակներն էլ կան ու կան  գործարար-պատգամավորին «խեղճացնելու» լծակներ միշտ էլ իշխող ուժն ունի։  

ԱԺ-ում տեղի ունեցավ «տրանսգենդերի» օպերացիան՝ ի սկզբանե հաշվարկված արձագանքներով։ Ակնհայտ էր, որ ելույթթ կազմակերպվել էր ԲՀԿ-ին հարվածելու համար եւ Նաիրա Զոհրաբյան նյարդերը տեղի տվեցին ու տրանսգենդերի օրակարգից դուրս ելույթը իբրև Մարդու իրավունքների հանձնաժողովի նախագահ հանգիստ լսելուց հետո՝ Ն.Զոհրաբյանը բարկացած արձագանքեց:

Փաշինյանի արձագանքը կատարվածի հանդեպ կտրուկ էր՝ «...Այս պրովոկացիայի կազմակերպման արդյունքում ԲՀԿ-ն պետք է մտածի՝ ընդհանրապես մարդու իրավունքների պաշտպանության հանձնաժողովում իրենց ներկայացրած հանձնաժողովի նախագահն արդյո՞ք մարդու իրավունքների պաշտպանության հանձնաժողովի նախագահ է և ինքը համապատասխանո՞ւմ է մարդու իրավունքների պաշտպանության հանձնաժողովի նախագահ լինելու համար անհրաժեշտ նվազագույն չափանիշներին: Թե՞ ամբողջ խնդիրը պրովոկացիա կազմակերպելն ու թիրախները «Իմ քայլը» խմբակցության դեմ ուղղելը»:

«Բարգավաճ Հայաստանը» մարտահրավերը ընդունեց ու  շատ հստակ Նաիրա Զոհրաբյանի կողքին կանգնեց՝ հակադարձելով Փաշինյանին՝ Նաիրան շատ լավ էլ համապատասխանում է իր ղեկավարած Մարդու իրավունքների հանձնաժողովին: Գագիկ Ծառուկյանն էլ իր շեշտադրումները մտցրեց ու սկսեց քննադատել կառավարության տնտեսական քաղաքականությունը։ Այ, սրանից հետո էր որ Ծառուկյանը կրկին հալածյալ դարձավ:

Նախօրեին հայտնի դարձավ, որ  Շուկայի վերահսկողության տեսչական մարմինն ստուգումներ է սկսել «Մուլտի գրուպ» կոնցեռն ԱԳԼՃԿ-ին պատկանող «Մուլտի գազ» գազալցակայանում։ «Փաստինֆո»-ի հարցմանն ի պատասխան այդ մասին հայտնել էին  ՇՎՏՄ-ից՝  որպես ստուգման հիմք նշելով ստացված բողոքը։ Տեսնես, այս դեպքում բողոքը անանուն էր, թե՞ անուն ուներ:

Սրան նախորդել էին  «Առինջ մոլ» տոնավաճառում իրականացված ստուգումները։ Թե՛ «Առինջ մոլ»-ը և թե՛ «Մուլտի գրուպ» կոնցեռնը պատկանում են ԲՀԿ խմբակցության ղեկավար Գագիկ Ծառուկյանի ընտանիքին և  ԲՀԿ պատգամավոր Իվետա Տոնոյանը «Փաստինֆո»-ի թղթակցի հետ զրույցում այս հանգամանքը կապել էր Ծառուկյանի կողմից իշխանության հասցեին հնչեցրած քննադատությունների հետ։

Մի խոսքով,  տեղային ու միջանձնային մարտերը աստիճանաբար վերաճում են միջկուսակցականի:

Ցավոք, այս ամենի արդյունքում միշտ տուժողը ժողովուրդն է լինում, այն ժողովուրդը, որին Փաշինյանը առերևույթ սիրում է, ամենազորի կարգավիճակ է տվել, բայց իրականում այդ կարգավիճակը իր ֆեյքերից չի տարբերվում: Իրականում  ժողովուրդը ատելության, ստի ու կեղծիքի գոտուց դուրս չի եկել: Դեռ ավելի է խրվել:

Հեղինակ` Արթուր Գահնապետյան