Փաստ ինֆո

Շիրակի մարզի Գյումրի քաղաքի հ. 27 դպրոցի տնօրեն Կ. Լ.-ի խափանման միջոց կալանավորումը փոխվել է: Այս մասին «Փաստինֆո»-ն տեղեկացավ ՀՀ գլխավոր դատախազի խորհրդական Գոռ Աբրահամյանի ֆեյսբուքյան գրառումից:

Աբրահամյանը նշել է, որ նախաքննության այս փուլում արդեն նվազել են քրեական դատավարությանը մասնակցող անձանց վրա անօրինական ազդեցություն գործադրելու, գործի համար կարևոր նշանակություն ունեցող նյութերը թաքցնելու կամ կեղծելու ճանապարհով քննությանը խոչընդոտելու, ինչպես նաև` քննությունից խուսափելու ռիսկերը:

Տնօրենի նկատմամբ նոր խափանման միջոց է ընտրվել ստորագրությունը` չհեռանալու մասին, և նա ազատ է արձակվել:

Հիշեցնենք, որ Գյումրու թիվ 27 միջնակարգ դպրոց» ՊՈԱԿ-ի տնօրենի դիմումի հիման վրա Շիրակի մարզային քննչական վարչությունում նախապատրաստված նյութերով փաստական տվյալներ էին ձեռք բերվել դպրոցում մի քանի առարկաների՝ ֆիզիկա, հայոց լեզու, քիմիա և ֆիզկուլտուրա, չդաասավանդման, սակայն համապատասխան ուսուցիչների կողմից աշխատավարձ ստանալու վերաբերյալ:

Դեպքի առթիվ 2019 թվականի փետրվարի 20-ին ՀՀ քրեական օրենսգրքի 179-րդ հոդվածի 2-րդ մասի 1-ին կետի և ՀՀ քրեական օրենսգրքի 325-րդ հոդվածի 1-ին մասի հատկանիշներով հարուցել էր քրեական գործ:

Վերոնշյալից բացի Գյումրի քաղաքի մի բնակիչ հաղորդում էր տվել նույն դպրոցում որպես ուսուցչուհի նշանակվելու նպատակով դպրոցի տնօրենի պահանջով և վերջինիս գործավարուհու միջոցով նրան կաշառք տալու և այդ ճանապարհով դպրոցում աշխատանքի անցելու մասին:

Նշված փաստերի առթիվ հարուցվել էր ևս երկու քրեական գործ, որոնցից մեկը՝ ՀՀ քրեական օրենսգրքի 311-րդ հոդվածի 3-րդ մասի 3-րդ կետի և ՀՀ քրեական օրենսգրքի 312-րդ հոդվածի 2-րդ մասի, մյուսը՝ ՀՀ քրեական օրենսգրքի 313-րդ հոդվածի 2-րդ մասի 2-րդ կետի հատկանիշներով: Քրեական երեք գործերը միացվել էին մեկ վարույթում:

Աղբյուր` Փաստինֆո