Փաստ ինֆո

Նորագավիթի մաքսատանը տեսուչին աշխատանքից ազատելու ՀՀ վարչապետ Նիկոլ Փաշինյանի բանավոր պահանջից հետո աշխատանքից ազատվելու Հայկ Մարտիրոսյանի դիմումը մակագրվելու մասին պաշտոնապես դեռ չի հաստատվում։
«Փաստինֆո»-ի հարցմանն ի պատասխան ՊԵԿ-ի լրատվական ծառայությունից ձեռնպահ մնացին որեւէ մեկնաբանություն տալ՝ նշելով, որ տեղեկատվություն ունենալու դեպքում կհայտնեն։

Նշենք, որ տեսուչի աշխատանքից ազատվելու դիմում ներկայացնելու մասին հայտնի դարձավ երեկ երեկ երեկոյան։ Ընդ որում՝ նկատենք, որ վարչապետի պահանջը վերաբերում էր նույն աշխատասենյակում նստող բոլոր անձանց, սակայն առայժմ խոսվում է միայն Հայկ Մարտիրոսյանի մասին։
«Աշխատավարձդ կծախսես, դրոշը կդնես գլխավերևում, հետո դիմումդ կգրես, կգնաս տուն, լսեցի՞ր: Ով աշխատել է այդ սենյակում, բոլորը հեռացվեն աշխատանքից, կզեկուցեք անձամբ ինձ»,- հայտարարել էր վարչապետը։
Մաքսատան աշխատակիցը լրագրողների հետ զրույցում պարզաբանել էր, որ դրոշը մի ժամանակ շենքի վերևում է փակցված եղել, հետո բերվել է աշխատասենյակ։

«Մեկ ամիս է երևի, ինչ մաքսայինին հատկացրել են այս շենքը, նախկինում ոստիկանության բաժանմունքն էր այստեղ նստում։ Դրոշը մաքսայինինը չի եղել, ոստիկանության գույքն է եղել»,-ասել է աշխատանքից ազատման դիմում գրած աշխատակիցը։
Մասնագետների կարծիքով՝ եթե տեսուչն ազատվի աշխատանքից ու դիմի ՄԻԵԴ, ապա կհաղթի կառավարությանը, քանի որ եթե անգամ դիտարկվի, որ տեղի է ունեցել դրոշի պահպանման խախտում, ապա՝ ակնհայտ է, որ գործել է մեղավորության կանխավարկածը, քանի որ աշխատանքից ազատելու պահանջ ներկայացվել է առանց պարզելու տեսուչի պարտականությունն է եղել դրոշի պահպանումը, թե ոչ։

Հեղինակ` Սոնա Գեւորգյան