Փաստ ինֆո

ՀՀ վարչապետ Նիկոլ Փաշինյանի ցուցումով հարուցված քրեական գործը Քննչական կոմիտեն  այսօր վարույթ է ընդունել։ Այս մասին  «Փաստինֆո»-ն տեղեկացավ ՀՀ ՔԿ հասարակայնության հետ կապերի եւ լրատվության բաժնի պետի պաշտոնակատար Նաիրա Հարությունյանից։ Նրա խոսքով՝ գործը վերաբերում է ինստիտուտի դիպլոմն առերևույթ կեղծելուն։

Նախնական տվյալներով ՝ ՀՀ բնապահպանության նախարարության «Դիլիջան» ազգային պարկ «ՊՈԱԿ-ի ինժեները 2019թ. փետրվար ամսին կադրերի բաժին է ներկայացրել Հայկական գյուղատնտեսական ինստիտուտը «գյուղատնտեսության մեքենայացում» մասնագիտությամբ 1993 թվականին ավարտելու և ինժեներ-մեխանիկի որակավորում ստանալու մասին դիպլոմի պատճեն, որից հետո հիշյալ կազմակերպությունում նշանակվել է բաժնի պետ-տնօրենի տեղակալի պաշտոնում:

Սակայն քննությամբ տվյալներ են ձեռք բերվել՝ ՊՈԱԿ-ի ինժեների կողմից կադրերի բաժին ներկայացված դիպլոմի՝ առերևույթ կեղծված լինելու մասին:

Դեպքի առթիվ 2019թ. ապրիլի 4-ին ՀՀ ԱԱԾ քննչական դեպարտամենտում հարուցվել է քրեական գործ՝ ՀՀ քրեական օրենսգրքի 325-րդ հոդվածի 1-ին մասով:

Կատարվում է նախաքննություն:

Հիշեցնենք, որ ապրիլի 4-ին Նիկոլ Փաշինյանը ֆեյսբուքյան գրառում էր արել` նշելով, որ իր ցուցումով իր ազգականի ենթադրյալ չարաշահման դեպքի առթիվ հարուցվել է քրեական գործ. «Կասկած չկա, որ գործը լիարժեք կքննվի և մեղավորները կենթարկվեն օրենքով նախատեսված պատասխանատվության: Սա նոր Հայաստան է, և վարչապետի որևէ մերձավոր չի կարող վեր լինել օրենքից կամ լինել արտոնյալ», - նշել էր նա:

Օրենսդիր և գործադիր իշխանության ղեկավար պաշտոնատար անձինք գործ հարուցելու ցուցում տալու իրավասությամբ օժտված չեն. Դատախազություն

Հեղինակ` Միլենա Խաչիկյան