Փաստ ինֆո

«Վերաքննիչ քրեական դատարանը, անտեսելով բոլոր հնարավոր նորմերը, շարունակեց պրն Քոչարյանին պահել կալանքի տակ»,- դատարանի որոշումից հետո այս կարծիքը հայտնեց Ռոբերտ Քոչարյանի պաշտպան Հայկ Ալումյանը:

Նրա խոսքով` Քոչարյանը որոշմանը արձագանքեց շատ ավելի հանգիստ, քան իր պաշտպանները. «Առաջին ատյանի դատարանը կայացրել էր չպատճառաբանված դատական ակտ, և մեր հիմնավորումներից մեկը հենց այդ մասին էր, բայց Վերաքննիչ դատարանի վրա դա կարծես տպավորություն չգործեց»,- ասաց Ալումյանը` հավելելով. «Դատարանի որոշումը ստանալուց հետո անպայման կբողոքարկենք»:

Ալումյանի խոսքով` դատարանի փաստարկը այն էր, որ Քոչարյանը, մնալով ազատության մեջ, կարող է խոչընդոտել քննությանը. «Սակայն Եվրոպական դատարանը այն կարծիքին է, որ քննությանը խոչընդոտելու հանգամանքը քննության միայն սկզբնական փուլերում է էական դեր խաղում»,-ասում է պաշտպանը:

Այս ընթացքում պաշտպանական կողմը շարունակում է ծանոթանալ գործի նյութերին, սակայն որևէ արտառոց բան չի հանդիպել. «Մեր բոլոր սպասելիքները` կապված քրեական գործի տվյալների հետ, արդարանում են, այսինքն` ցանկացած բան, որը մինչ այս մենք պնդել ենք, վերստին հաստատվում է գործի այս կամ այն նյութով»:

Պաշտպանական կողմի փաստարկներից մեկը վերաբերում է Քոչարյանին մեղսագրված 300.1-րդ հոդվածին. «Այս հոդվածը 2008 թվականին գոյություն չուներ, իսկ 2009 թվականին գոյություն ունեցող 300-րդ հոդվածի համեմատ անձի վիճակը վատթարացնող է, ուստի չի կարող մեղսագրվել պրն Քոչարյանին»-պնդում է պաշտպանը և հավելում. «Մենք նշեցինք, որ Դատախազությունը գործով յոթ մեղադրյալների նկատմամբ ժամանակին քրեական հետապնդումը դադարեցնելու մասին որոշում էր կայացրել` հիմք ընդունելով հենց այդ վատթարացնող հանգամանքը: Սրան ի պատասխան` երեկվա դատախազը քննադատեց այն դատախազներին, ովքեր ժամանակին նման որոշում էին կայացրել: Ստացվում է` Դատախազությունը այսօր չի հասկանում 2009 թվականին իր իսկ կայացրած որոշումը»:

Պաշտպանի խոսքով` եթե այդպես է, ապա պետք է վերաբացվեն նաև այդ յոթ հոգու գործերը. «Եվ թող մեղադրանք առաջադրեն նաև նրանց, ում մեղադրանք առաջադրված չի եղել` հենց նույն վատթարացնող հանգամանքից ելնելով»:

Նշենք, ո Քոչարյանի դեմ միակ ցուցմունքը շարունակում է մնալ Արշակ Կարապետյանի ցուցմունքը. «Արշակ Կարապետյանն ասում է, որ փետրվարի 24-ից հանձնարարվել է մտցնել արտակարգ դրություն, և այս հանգամանքը փորձում են ապացուցել հենց այդ ցուցմունքով: Իրավական վեճն այս մակարդակի է»:

Հավելենք, որ դատախազի բողոքը` առաջին ատյանի դատարանի որոշման պատճառաբանական մասի վերաբերյալ, ևս մերժվեց, և ուժի մեջ մնաց առաջին ատյանի այն որոշումը, ըստ որի կաշառքի մասով հիմնավոր կասկածը բացակայում է:

Հեղինակ` Միլենա Խաչիկյան