Փաստ ինֆո

Պետական վերահսկողության ծառայության գնումների վերահսկողության վարչության պետ Սամվել Ադյանի պաշտպանական կողմի Վերաքննիչ բողոքը` նրա նկատմամբ որպես խափանման միջոց կալանավորումն ընտրելու մասին ընդհանուր իրավասության դատարանի որոշման դեմ, մերժվել է: Այս մասին «Փաստինֆո»-ին տեղեկացրեց Ադյանի պաշտպան Դավիթ Մնացականյանը. «Որոշումը բողոքարկել էինք մարտի կեսերին, պատասխանը եկել է մի քանի օր առաջ: Մերժման հիմքում նշված է, որ «հիմնավոր կասկածը եւ կալանավորման հիմքերը առկա են»:

Պաշտպանի խոսքով` իրենք զուգահեռ ներկայացրել էին նաեւ գրավի միջնորդություն, որը եւս մերժվել է:

Դավիթ Մնացականյանը նշեց, որ քննարկում են Վճռաբեկ դատարան դիմելու հարցը. «Կարելի է ասել, որ արդեն իսկ որոշված է, որ կդիմենք Վճռաբեկ դատարան, պարզապես բողոքը դեռեւս պատրաստ չէ»:

Հիշեցնենք, որ փետրվարի 26-ին լուրեր տարածվեցին այն մասին, որ ԱԱԾ-ն ձերբակալել է Պետական վերահսկողական ծառայության 4 աշխատակցի, այդ թվում՝ վարչության պետերի։ Հետագայում ՊՎԾ-ն հանդես եկավ հայտարարությամբ՝ պնդելով, որ տարածված լուրերը խեղաթյուրված են։ Ավելի ուշ ԱԱԾ հայտարարությունից պարզ դարձավ, որ ձերբակալվել է ՊՎԾ երկու աշխատակից՝ Ադյանը եւ  Գեւորգ Խաչատրյանը։ Գործով կա նաեւ երրորդ մեղադրյալը, ով տնտեսվարող սուբյեկտի ներկայացուցիչ է՝  Տարոն Ավետիսյանը։

Նշենք, որ Սամվել Ադյանին մեղադրանք է առաջադրվել քրեական օրենսգրքի 308-րդ հոդվածի 2-րդ մասով, այն է՝ պաշտոնական լիազորությունների չարաշահումը, որն անզգուշությամբ առաջադրել է ծանր հետեւանքներ, եւ 325-րդ հոդվածի 2-րդ մասով, այն է՝ մի խումբ անձանց հետ նախնական համաձայնությամբ փաստաթղթեր, դրոշմներ, կնիքներ, ձևաթղթեր, տրանսպորտային միջոցների պետհամարանիշներ կեղծելը, իրացնելը կամ օգտագործելը։

Մնացականյանի խոսքով՝ իր պաշտպանյալը ցուցմունք տվել է, եւ մեղադրանքը չի ընդունում։

Լուսանկարում՝ ՊՎԾ պետ Դավիթ Սանասարյանը։

Հեղինակ` Միլենա Խաչիկյան