Փաստ ինֆո

«Ինձ համար` որպես իրավաբանի եւ փաստաբանի, ճիշտ եւ արդարացի կլինի, որ ՀՀ իրավապահ մարմինները չսպասեն որեւէ հրահանգի եւ իրականացնեն ՀՀ Սահմանադրությամբ ամրագրված իրենց գործառույթները»,-«Փաստինֆո»-ի հետ զրույցում այս կարծիքը հայտնեց իրավաբան Նորայր Նորիկյանը:

Խոսելով «Դուխով Հայաստան բաց հասարակություն» էջը համակարգող անձի կալանավորումից եւ առաջադրված մեղադրանքից` Նորիկյանը նշեց, որ այս գործով տեղեկատվության սահմանափակ լինելը թույլ չի տալիս ամբողջական դիրքորոշում հայտնել, հասկանալ, թե նշված օգտատիրոջ անվան տակ գործող անձը կոնկրետ ինչ գործողություններ է իրականացրել` ուղղված ազգային, ռասսայական կամ կրոնական թշնամանք հարուցելուն, եւ կոնկրետ ինչ հանգամանքներում է դրսեւորվել այդ ամենը, սակայն անկախ այն բանից, թե ինչպիսի հանցագործություն է կատարվում եւ ում կողմից, իրավապահ մարմինների գործելաոճը պետք է լինի մեկը. «Եթե  առերեւույթ առկա են հանցագործության հատկանիշներ պարունակող հանգամանքներ, լինի Ազգային անվտանգության ծառայությունը, Քննչական կոմիտեն, Հատուկ քննչական ծառայությունը, Ոստիկանությունը, Դատախազությունը թե մեկ այլ մարմին, իրենց իրավասությունների սահմաններում պարտավոր են առանց որեւէ հրահանգի իրականացնել համապատասխան իրավական ընթացակարգերով սահմանված գործառույթներ` հանցավորության դեմ պայքարելու, քրեական պատասխանատվության ենթարկելու, քրեական հետապնդում իրականացնելու եւ հանցագործությունները կանխելու համար»:

Նշենք, որ առաջադրված մեղադրանքի հոդվածը չի տարանջում իրական եւ կեղծ պրոֆիլներ, ուստի իրավաբանի կարծիքով` անկախ այն բանից, թե քրեական օրենսգրքով արգելված արարքը իրականացնում է բացահայտ անձը թե կեղծ օգտատերը, այդ արարքներին պետք է տրվի համապատասխան գնահատական. «Պետք է հասկանանք` ինչ վարքագծով են դրսեւորվում մեղադրանքի հիմքում ընկած փաստական հանգամանքները, եւ անկախ իրական կամ կեղծ լինելուց, այդ վարքագծին պետք է տրվի իրավական գնահատական»:

Հիշեցնենք, որ ապրիլի 4-ին ՀՀ վարչապետ Նիկոլ Փաշինյանը ԱԱԾ տնօրեն Արթուր Վանեցյանին հանձնարարել էր բացահայտել եւ կոշտ հակահարված տալ ֆեյքերին` կասկածի տակ չդնելով խոսքի ազատությունը. «Եթե որոշ հանցավոր շրջանակներ միլիոններ են ծախսելու մանիպուլյացիաներ անելու համար, դա ազգային անվտանգության խնդիր է։ Հույս ունեմ, որ այս հարցում կկարողանանք կոնկրետ արդյունքներ ապահովել», - ասել էր նա:

Մեկ օր անց Արթուր Վանեցյանը լրագրողների հետ զրույցում հայտնել էր, որ «Դուխով Հայաստան բաց հասարակություն» էջի հեղինակը բացահայտվել է եւ հարցաքննվել:

Արդեն հաղորդել ենք, որ «Դուխով Հայաստան բաց հասարակություն» էջը համակարգող անձը կալանավորվել է եւ նրան մեղադրանք է առաջադրվել ՀՀ ՔՕ-ի 226 հոդվածի 2-րդ մասի 1-ին կետով, այն է`ազգային, ռասայական կամ կրոնական թշնամանք հարուցելուն, ռասայական գերազանցությանը կամ ազգային արժանապատվությունը նվաստացնելուն ուղղված գործողությունները, որ կատարվել են հրապարակայնորեն կամ լրատվության միջոցներ օգտագործելով:

Հեղինակ` Միլենա Խաչիկյան