Փաստ ինֆո

Վերաքննիչ քրեական դատարանում քիչ առաց հետաձգվեց  ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորումը ևս երկու ամսով երկարացնելու վերաբերյալ առաջին ատյանի դատարանի որոշման դեմ պաշտպանական խմբի կողմից ներկայացված բողոքի քննությունը:

Քոչարյանի պաշտպան Արամ Օրբելյանը լրագրողներին հայտնեց, որ նիստը հետաձգվեց՝ աշխատանքային օրվա ավարտով պայմանավորված. «Որոշ հարցերի վերաբերյալ Քոչարյանն ընթացքում դիրքորոշում հայտնեց, սակայն հիմնական ելույթը դեռ չի ունեցել»:

Խոսելով ներկայացված առարկությունների մասին՝  Օրբելյանն ասաց, որ մեղադրանքի շրջանակում առարկությունները որպես այդպիսին այս փուլի քննարկան առարկա չեն. «Վճռաբեկ դատարանի, ՄԻԵԴ-ի եւ գործող Քրդատօրենսգրքի մի շարք հոդվածներով նախատեսված է, որ կալանքի հետ մեկտեղ պետք է քննվի մեղադրանքի առերեւույթ հիմնավոր կամ ոչ հիմնավոր լինելը՝ առանց ապացույցները ուսումնասիրելու, սակայն գլոբալ իմաստով քննարկան առարկան առաջին ատյանի որոշման օրինականությունն ու հիմնավորվածությունն է»:

Օրբելյանի խոսքով՝ իրենց հիմնական արգումենտները վերաբերում են անձեռնմխելիությանը, քննությունը միակողմանի անցկացնելուն եւ մեղադրանքի ոչ հստակ լինելուն:

Նշենք, որ ապրիլի 6-ին լրացել է գործին ծանոթանալու համար տրված ժամկետը: Պաշտպանի փոխանցմամբ՝ երկարաձգելու միջնորդությունը մերժվել է, սպասում են մեղադրական եզրակացությանը: Նա եւս մեկ անգամ շեշտեց, որ իրենց ծանոթացած մասում որեւէ շոկային տեղեկություն չկա:

Պատասխանելով լրագրողների այն հարցին, թե ինչպես է իրեն զգում Ռոբերտ Քոչարյանը, Օրբելյանը նշեց, որ նա խցում մենակ է, եւ լավ տրամադրություն ունի. «Պրն Քոչարյանը համոզված է, որ մեղավոր չէ, եւ վերջում արդարացվելու է: Նա զբաղվում  է նյութերի ծանոթանալով, մասնագիտական ընթերցանությամբ, երբեմն՝ յոգայով, հնարավորության դեպքում նաեւ զբոսնում է»:

Դատական նիստը կշարունակվի վաղը՝ ժ. 12:30-ին:

Հեղինակ` Միլենա Խաչիկյան