Փաստ ինֆո

Պետական եկամուտների կոմիտեն դեռ վարչապետին չի զեկուցել՝ արդյոք աշխատանքից ազատվել են այն ծառայողները, որոնց ինքը հանձնարարեց ազատել նախորդ օրը Նորագավիթի մաքսատուն կատարած այցի ժամանակ։

«Ոչ, դեռ չեմ ստացել», - այսօր ասաց վարչապետը՝ պատասխանելով լրագրողի այն հարցին, թե արդյոք հանձնարարության կատարման մասին արդեն զեկուցել են։

Հարցին՝ շարունակո՞ւմ է պնդել, որ աշխատակիցները պետք է հեռացվեն, վարչապետն ասաց. «Ես մի բանը մի անգամ եմ ասում»։

Նիկոլ Փաշինյանն ընդգծեց՝ եթե որևէ մեկը գտնում է, որ ՀՀ վարչապետը չի կարող պաշտպանել ՀՀ դրոշը, ուրեմն իրենց պատկերացումները պետության մասին այլ են։

Հիշեցնենք, որ մաքսակետում վարչապետին չէր գոհացրել մաքրությունը, իսկ աշխատասենյակներից մեկում էլ դրոշը դրված է եղել անկյունում։ Վարչապետն անմիջապես դիմելով աշխատակցին ասել էր՝ «Դիմումդ կգրես, կգնաս տուն, լսեցի՞ր: Ով աշխատել է այդ սենյակում, բոլորը հեռացվեն աշխատանքից: Դրանց կանգնելու ձեւը, հագուկապը, ոնց որ քուչում լինեն: Լավ ա չեն պպզել: Ինչ կապ ունի, որ վարձակալած տարածք է: Որ գնում ենք վարձով տանն ապրելու, ասում ենք՝ ոչինչ թող խոզանոց լինի՞»:

Աղբյուր` Փաստինֆո