Փաստ ինֆո

ՀՀ վարչապետ Նիկոլ Փաշինյանի՝ Նորագավիթի մաքսատանը շրջայց կատարելու ժամանակ քաղաքացիներից մեկը և բողոքեց, որ իրենց պետհամարանիշ չեն տրամադրում։

«Պետավտոտեսչությունը մեզ պետհամարանիշ չի տրամադրում, որ մարդիկ այն տեղադրեն ու գնան իրենց երկիր, ասում են` թիթեղ չկա»,– ասաց քաղաքացին։ Պատճառները պարզելու համար վարչապետը տեղում զանգեց ՀՀ ոստիկանապետ Վալերիյ Օսիպյանին։

«Էս ի՞նչ պատմություն ա, պարոն Օսիպյան։ Պետհամարանիշ չկա, որովհետև թիթեղ չկա՞»,–հարցրեց Փաշինյանը։ Հետո լսեց Օսիպյանի պատասխանը և ավելացրեց. «Եթե անցած տարվանից գիտեինք, պետք էր կանխատեսել։ Դե արագացրեք»։

Ոստիկանապետի հետ զրույցից հետ վարչապետը պարզաբանեց, որ ներկրվող մեքենաների շատ մեծ ծավալ է գալիս Հայաստան, Օսիպյանն ասել է, որ իրենք կանխատեսել էին դա, սակայն կանխատեսածից շատ է եղել մեքենաների քանակը։

«Հիմա թիթեղը հասել է Փոթի ու գալիս է Երևան,– ասաց Փաշինյանն ու կատակեց,– крепитесь, запад нам поможет»։

Նշենք, որ երեկ ոստիկանությունը պաշտոնական հաղորդագրություն էր տարածել՝ նշելով, որ ոստիկանության հաշվառման-քննական ստորաբաժանումներում դադարեցվել է ավտոմեքենաների հաշվառման համարանիշերի տրամադրումը։ Պատճառը տեխնիկական է. ավտոմեքենաների մեծ ներհոսքով պայմանավորված՝ ծագել է համարանիշերի մատակարարման ընդհատում:

Աղբյուր` Փաստինֆո