Փաստ ինֆո

Մարդու իրավունքների եվրոպական դատարանը արձագանքել է ՀՀ կառավարության՝ ԱԺ նախկին պատգամավոր Մանվել Գրիգորյանի գործին վերաբերող պատասխաններին եւ նամակով դիմել պաշտպանական կողմին: Այս մասին «Փաստինֆո»-ին հայտնեց Գրիգորյանի պաշտպան Լեւոն Բաղդասարյանը. «Նամակն այսօր ենք ստացել, ուղարկել են կառավարության դիրքորոշումը: Ուսումնասիրելուց հետո դրա վերաբերյալ պաշտոնապես կխոսենք»:

Բաղդասարյանը նշեց, որ ուսումնասիրման համար իրենց տրվել է եռօրյա ժամկետ, դրանից հետո պետք է ներկայացնեն իրենց առարկություններն ու առաջարկները. «Լիահույս եմ, որ համապատասխան գնահատական կտրվի, բայց ցավոք, այդ դեպքում արդեն պատասխանատվություն կկրի  ոչ թե լիազոր մարմինը, այլ Հայաստանի Հանրապետությունը: Ունենալով պոզիտիվ պարտականություն՝ լիազոր մարմինը դա չիրականացրեց»:

Լեւոն Բաղդասարյանը չբացառեց, որ  ՄԻԵԴ կդիմեն նաեւ կալանքի հետ կապված գործընթացներով, որոնք համարում են ոչ իրավաչափ լիազոր մարմնի կողմից:

Հիշեցնենք, որ 2019 թվականի մարտի 12-ին Մանվել Գրիգորյանի փաստաբանը, դիմելով Եվրոպական դատարան, խնդրել էր, որ վերջինս, Դատարանի կանոնակարգի 39-րդ կանոնի համաձայն, միջանկյալ միջոց ձեռնարկի` պարտավորեցնելով ՀՀ իշխանություններին Մանվել Գրիգորյանին անհապաղ տեղափոխել քաղաքացիական հիվանդանոց՝ համապատասխան բժիշկ մասնագետների հսկողության  տակ, ինչպես նաև վերջինիս անհապաղ տեղափոխել Ֆրանսիայի Հանրապետությունում գտնվող իր կողմից մատնանշված բուժհաստատություն՝ հետագա ստուգման և բուժման նպատակով:

Մարտի 22-ին Եվրոպական դատարանը որոշում էր կայացրել հետաձգել միջանկյալ միջոց ձեռնարկելու հարցի քննությունը՝ պահանջելով ՀՀ կառավարությունից մինչև սույն թվականի ապրիլի 3-ը ներկայացնել համապատասխան տեղեկատվություն: Կառավարության պատասխանն ուղարկվել էր ապրիլի 3-ին:

Հեղինակ` Միլենա Խաչիկյան