Փաստ ինֆո

Սվերդլովի մարզային դատարանը սկսել է ուսումնասիրել  չեչեն Մովսուր Հասայեվի գործը, ով մեղադրվում է Եկատերինբուրգում քրեական  «հեղինակություն»  համարվող Աշոտ Հարությունյանի սպանության մեջ: Այս մասին հաղորդում է Ura.ru-ն՝ հղումով դատարանի մամլո ծառայությանը:

Դատարանում հայտարարել էին, որ գործը ուսումնասիրելու են ատենակալները: Պրոցեսը վարելու է դատավոր Անդրեյ Մինեեվը: Առաջին նիստը տեղի է ունեցել ապրիլի երկուսին, որի ժամանակ ընտրել են ատենակալներին։

Հաղորդվում է, որ ատենակալներ պահանջել է ինքը՝ Հասայեվը՝ գործին ծանոթանալուց և փաստաբանի հետ խորհրդակցելուց հետո:  Այդպիսով՝ սպանության մեջ մեղադրվողն ակնկալում է հասնել արդարացման:

Փաստաբան Օլեգ Չիստյակովը  պնդում է, որ գործում չկա ոչ մի ապացույց, որ սպանության պահին  Հասայեվը եղել է քաղաքում:

«Նա ուներ հեռախոս, որով կապվում էր նաև Եկատերինբուրգի ծանոթների հետ, բայց  բիլինգի տվյալներով Հասայեվը չի եղել այն վայրերում, որտեղ վերջին անգամ գտնվել է տուժողը», — հայտարարել է փաստաբանը: 

Նա նշում է նաև, որ Հասայեվն ունի այլուրեքություն. սպանության օրը նա, իբր, եղել է Չեչնիայում՝ հարազատի հուղարկավորության արարողությանը:  «Կան բազմաթիվ վկաներ, ովքեր հաստատել են դա», - ընդգծում է փաստաբանը: Մեղադրյալի  հարազատները նույնիսկ հանրային ակցիաներ են կազմակերպել  Մոսկվայում՝ ի սատարումն  Հասայեվի:

Քննության վարկածով  2011թ-ի մայիսի  28-ին Հասայեվը կրակելով սպանել է Հարությունյանին Բելինսկի փողոցում՝  շենքի բակում: Քիլերը մոտեցել է «հեղինակությանը» թիկունքից և կրակել ծոծրակին: Դրանից հետո սկսել է կրակ արձակել թիկնապահների վրա:  Սկզբում համարում էին, որ սպանողը  Հարությունյանի ծանոթն է՝  ծագումով չեչեն Ռոման Յուսուպոբվը. նա ձերբակալված էր մեկ այլ գործով և առեղծվածային հանգամանքներում մահացել էր կալանավայրում: Հետո քննիչները ուշադրություն էին դարձրել մի լուսանկարի վրա, որտեղ պատկերված էր Յուսուպովը իր հայրենակիցների հետ՝ այդ թվում նաև Հասայեվի:

2018թ.-ի հունվարին նրան ձերբակալել են Արգունում և բերման ենթարկել Եկատերինբուրգ:
 

Աղբյուր` Փաստինֆո