Փաստ ինֆո

«Ես միայն արդարություն եմ խնդրում»,- երեկ՝ մարտի 5-ին, Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանում ընթացող նիստի ժամանակ հայտարարել է ԱԺ պատգամավոր Էդուրադ Բաբայանը. «Եթե արել եմ չեղած բանը, ուրեմն՝ պատժեք օրենքով, բայց ես այն չեմ արել»,- նշել է նա։ Բաբայանի այս խոսքերը «Փաստինֆո»-ի հետ զրույցում հայտնեց վերջինիս պաշտպան Արմեն Մելքոնյանը։

Ինչպես արդեն նշել ենք, Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանը՝ դատավոր Մեսրոպ Մակյանի նախագահությամբ, ԱԺ պատգամավոր Էդուարդ Բաբայանին մեղավոր է ճանաչել ՀՀ քրեական օրենսգրքի 112-րդ հոդվածի 1-ին մասով, դատապարտել 3 տարի 6 ամիս ժամկետով ազատազրկման եւ համաներմամբ ազատ արձակել պատիժը կրելուց։ Պաշտպանական կողմը, սակայն, համաձայն չէ հրապարակված դատավճռին, քանի որ պնդում է, որ Բաբայանը ենթակա է արդարացման. «Երբ որոշումը ստանամ, տեսնեմ իրավական մտքի կարկառուն ձեւակերպումները, կհասկանամ դրանց իմաստն ու կարծում եմ՝անպայման կբողոքարկեմ»,- ասաց Մելքոնյանը։

Նրա խոսքով՝ իր պաշտպանյալին մեղադրելու համար որեւէ ապացույց գործում չկա. «Հարությունովը դեղերի ազդեցության տակ արտահայտել է մտքեր, որոնք գաղտնալսել են, եւ երբ թմրադեղերի ազդեցությունն անցել է, մարդն առաջին իսկ պահից ասել է, որ այլ է ճշմարտությունը։ Այդ ամենը չի ընդունվել»։

Մելքոնյանի փոխանցմամբ՝ երեկ տուժողը հարցաքննվել է, սպառիչ պատասխաններ տվել դատավորի հարցերին եւ նույնիսկ ասել. «Եթե իմ արտահայտած մտքերի պատճառով մարդ պետք է դատվի, ապա թող ես դատվեմ. եթե Բաբայանը ոչինչ չունի արած, ապա ես գոնե նման մտքեր եմ արտահայտել»,-ասել է նա։

Անդրադառնալով գործով որպես իրեղեն ապացույց հանդիսացող ձայնագրություններին՝ Արմեն Մելքոնյանը նշեց, որ դրանք կցկտուր են ներկայացված. «Եթե մարդուն ներքին կամ արտաքին դիտում են անում, պարտավոր են ամբողջը տրամադրել։ Էս մարդն ասում է ՝ ես կնոջս ճիշտը պատմել եմ, ընկերոջս ճիշտը պատմել եմ, բայց եկել է հարևանս, իր մոտ լավ տղա ձեւանալու համար ասել եմ՝ Ծառուկյանին խփեցի, սրան խփեցի, իրենք ինձ խփեցին, ես էլ՝ նրանց»։

Մելքոնյանը հավաստում է՝ Հարությունովը տարբեր տեղեր տարբեր բաներ է ասել. «Ինքը երեկ դատարանում հայտարարեց՝ «Կռուտիտներ եմ արել, բայց ես հո չե՞մ իմացել, որ ձայնագրվում եմ»։

Պաշտպանական կողմն այդ գաղտալսումներն առհասարակ ապօրինի է համարում։

Մելքոնյանը նշեց նաեւ, որ Վյաչեսլավ Հարությունովը պատրաստակամություն է հայտնել գնալ, ցույց տալ տեղը, ուր ինքն ընկել է, նաեւ տվել է անուններ այն մարդկանց, ովքեր են իրեն օգնել են ընկնելուց հետո. «Դատավճիռը ստանալուց հետո կկարողանանք ասել՝ դատարանն ինչ հիմքով է դատավճիռը կայացրել»,-եզրափակեց նա։

Արդեն տեղեկացրել ենք, որ քրեական գործով դատավարությունն սկսվել էր մարտի 21-ին, եւ դատարանը որոշել էր դռնփակ իրականացնել ապացույցների՝ տեսաձայնագրության հետազոտման փուլը, որը պետք է շարունակվեր նաեւ ապրիլի 5-ին։ Սակայն այդ օրը, պարզվում է, դատարանը ավարտել է ընդհանրապես ապացույցների հետազոտումը, այդ թվում՝ ամբաստանյալի, տուժողի հարցաքննությունը։ Այնուհետեւ` անցել դատական վիճաբանությունների փուլին, որի ժամանակ մեղադրող եւ պաշտպանող կողմերը հանդես են եկել ճառերով, ինչից հետո դատարանը հեռացել է խորհրդակցական սենյակ  եւ հրապարակել դատավճիռը։

Հեղինակ` Միլենա Խաչիկյան