Փաստ ինֆո

ՀՀ երկրորդ նախագահ Ռոբերտ Քոչարյանի խափանման միջոցի գործով այսօր Վերաքննիչ քրեական դատարանում սկսված դատական նիստը հետաձգվեց: Պաշտպան Արամ Օրբելյանը լրագրողների հետ զրույցում նշեց, որ իրենք ավարտել են բողոքների ներկայացման փուլը, հաջորդ նիստը կմեկնարկի դրանց առարկությունների ներկայացումամբ: Սրան կհաջորդի մեկնաբանությունների փուլը, որից հետո արդեն դատարանը կգնա` որոշում կայացնելու:

Նշենք, որ Քոչարյանն այսօր չի հասցրել ելույթ ունենալ: Պաշտպանի փոխանցմամբ` ակնկալվում է, որ հաջորդ նիստին նա արդեն կխոսի. «Տեխնիկական որոշ հարցերի նա պատասխանել է, որովհետեւ ավելի երկար ժամանակ է ունեցել` գործի նյութերին ծանոթանալու, քան մենք, սակայն իր հիմնական ելույթը դեռ չի ունեցել»:

Արամ Օրբելյանը ներկայացրեց այն հիմնավորումները, ըստ որոնց` Քոչարյանի կալանքը պետք է փոխվի. «Առաջին հանգամանքն այն է, որ Առաջին ատյանի դատարանի որոշումը պատճառաբանված չէ. այն չի անդրադարձել մեր մի քանի բողոքների: Երկրորդը վերաբերում է պրն Քոչարյանի պատշաճ կարգավիճակին.  կա Վճռաբեկ դատարանի առնվազն մեկ որոշում, ըստ որի` որպեսզի անձը լինի մեղադրյալ, բացի նրանից, որ իրեն այդ գրությամբ թուղթ են տալիս, նաեւ պետք է պատճառաբանվի մեղադրանքի էությունը: Դա մեղադրյալի անկյունաքարային իրավունքներից է. նա պետք է իմանա ոչ թե հոդվածի համարներով, այլ այդ հոդվածի շրջանակում կոնկրետ գործողություններով: Մենք հայցադիմում ենք ներկայացրել սրա վերաբերյալ, ինչին հստակ պատասխան եւ հստակ արձագանք չենք ստացել, այսինքն` մեղադրանքի էությունը պատճառաբանված չէ»: Երրորդ հանգամանքը, ըստ պաշտպանի, անձեռնմխելիության հարցն է:

Նշենք, որ ապրիլի 6-ին լրանում է գործին ծանոթանալու ժամկետը, իսկ պաշտպանական կողմը ուսումնասիրել է դրա մի մասը միայն. «Մեր ծանոթացած մասում չկա որեւէ ցուցմունք կամ հանգամանքը, որն ամբողջությամբ կհերքի մեր դիրքորոշումը»: Օրբելյանի խոսքով` նյութերին ծանոթանալիս ոչ մի արտառոց բանի չեն հանդիպել. «Եթե որեւէ բան լիներ էլ, սահմանադրական կարգի տապալման հիմքեր չէին կարող լինել , որովհետեւ սահմանադրական կարգը 2008 թ.-ին ՀՀ-ում չի տապալվել»:

Օրբելյանը ընդգծեց նաեւ, որ դատարանն իրավունք չունի այս փուլում անդրադառնալ Դատախազության բողոքին` ընդդեմ Առաջին ատյանի որոշման պատճառաբանական մասի. «Քրդատօրենսգրքով սահմանված չէ, որ Վերաքննիչ դատարանը կարող է փոխել որոշման հիմնավորում կամ վերաշարադրել այն, այսինքն` դատարանը կամ պետք է մերժի բողոքը, կամ բավարարի այն»:

Հիշեցնենք, որ Վերաքննիչ քրեական դատարանում՝ դատավոր Ռուզաննա Բարսեղյանի նախագահությամբ, այսօր քննվում էր ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորումը ևս երկու ամսով երկարացնելու վերաբերյալ առաջին ատյանի դատարանի որոշման դեմ պաշտպանական խմբի կողմից ներկայացված բողոքը:

Հաջորդ նիստը կկայանա ապրիլի 9-ին` ժ. 14:30-ին:

Հեղինակ` Միլենա Խաչիկյան