Փաստ ինֆո

Հայաստանի վարչապետ Նիկոլ Փաշինյանի գնահատմամբ՝  իր ազգականի վերաբերյալ քրեական գործ հարուցելու ցուցում տալու  իր գործողությունն օրինական է։ 

«Հարգելիներս, ես ցուցում եմ տվել ստացված օպերատիվ տեղեկությանը օրենքով նախատեսված ընթացք տալու մասին, ինչի արդյունքում հարուցվել է քրգործ:

Ցուցումը տվել եմ վարչապետին ենթակա մարմնին: Ամեն ինչ կարգին է, ամեն ինչ օրինական է:

Շնորհակալ եմ ձեր մտահոգությունների համար», - իր ֆեյսբուքյան էջում գրել է Փաշինյանը:

Ավելի վաղ, «Փաստինֆո»-ն տեղեկացրել է, որ քրեական գործը քննվում է ԱԱԾ-ի վարույթում։ 

Նիկոլ Փաշինյանի նկատմամբ քրեական գործ կհարուցվի՞

Նշենք, որ երեկ երեկոյան Փաշինյանը ֆեյսբուքյան իր էջում գրել էր, որ իր ազգականը ենթադրյալ չարաշահումների համար կարող է հայտնվել քրեական գործի թիրախում ու նշել, որ իր «անմիջական ցուցումով» քրեական գործ է հարուցվել մերձավոր ազգականի թույլ տված ենթադրյալ չարաշահման փաստի առիթով։

Այսօր լրագրողների հետ ճեպազրույցում Մարդու իրավունքների պաշտպան Արման Թաթոյանն արձագանքել էր, որ Քրեական դատավարության օրենսգիրքը սահմանում, թե ով ինչ ցուցումներ կարող է տալ քրեական գործ հարուցելու համար և դա ոչ թե վարչապետն է, այլ դատախազը։ Այսինքն՝ թեեւ ԱԱԾ-ն վարչապետին ենթակա կառույց է, միեւնույն է, նա քրգործերով ցուցումներ տալու լիազորություն չունի։ ՀՀ վարչապետի իրավասությունների շրջանակն սահմանված է ՀՀ Սահմանադրության 152-րդ հոդվածում, որտեղ նրան քրգործերով  ցուցումներ տալու իրավունք վերապահված չէ, իսկ պաշտոնյաները պարտավոր են անել միայն այն, ինչի իրավասությունն ունեն։

Ի դեպ՝ մեկ տարի առաջ Նիկոլ Փաշինյանը, նախքան վարչապետ դառնալը՝ 2018 թվականի ապրիլի 30-ին հայտարարել էր. «Ես կարող եմ երաշխավորել, որ իշխանության տարանջատման սկզբունքը կպահպանվի։ Ես չեմ պատրաստվում ՀՀ վարչապետի կարգավիճակում լինել և՛ վարչապետ, և՛ դատախազ, և՛ դատավոր, և՛ քննիչ։ Հակառակ դեպքում մենք կընկնենք մի դաշտ, երբ մի կետից որոշվում է՝ ով է մեղավոր, ով՝ անմեղ»։

Աղբյուր` Փաստինֆո