Փաստ ինֆո

ՀՀ վարչապետ Նիկոլ Փաշինյանն այսօր շատ կտրուկ արձագանքեց բնական գազի գնի բարձրացմանը վերաբերյալ տեղեկություններին:

«Ոմանք փորձում են մանիպուլյացիաներ անել, պետական մարմինների արձագանքը պետք է կոշտ լինի: Եթե որոշ նախկին օլիգարխներ մտածում են, որ կարողանալու են այս իրավիճակում մանիպուլյացիաների դաշտ մտնել, սխալվում են», - հայտարարեց ՀՀ վարչապետը` ավելացնելով. «ես վերջին անգամ ուզում եմ զգուշացնել, որ մեր բարեկրթությունը որևէ մեկը չփորձի մեկնաբանել որպես թուլություն, թե չէ շատ դաժան հակահարված կստանան անձնապես՝ բոլորը առանց բացառության: Որևէ մեկը թող չտրվի գայթակղությանը ժողովրդի վստահությունը վայելող կառավարության հակահարվածի ուժն իր ծնոտին զգալու համար, ես շատ ուղիղ և հասցեական եմ սա ասում»:

Նիկոլ Փաշինյանը հանձնարարեց պատկան մարմիններին ուսումնասիրել և պատժել մանիպուլյացիաներ անող տնտեսվարողներին: «Ստվերի դեմ պայքարում մենք կոմպրոմիս չունենք, չլինի գազալցակայան, որ ՀԴՄ չտպի, եթե պետք է գազալակայանները ՀԴՄ խփելով սնանկանան, թեև դա հնարավոր չէ, ապա թող սնանկանան: Ժողովրդի, պետության հաշվին ապօրինի հարստացող մարդիկ չեն լինելու Հայաստանում և ուզում եմ հստակ այս ամենը արձանագրենք», - ասաց նա։

Նշենք, որ երեկվանից բնակիչներն ահազանգեր են հնչեցնում ավտոգազալցման կայաններում գազի գնի թանկացման վերաբերյալ: Մնչդեռ Շուկայի վերահսկողության տեսչական մարմնի ղեկավար Արմեն Կոտոլյանը կառավարության նիստում հայտարարեց, որ որպես այդպիսին, գազի գնի փոփոություն տեղի չի ունեցել:

«Ամսական միջին հաշվարկներով վերջին տարիներին գազի խտությունը 7,1 է եղել, բայց վերջերս դարձել է 7,9, սակայն տնտեսվարողները ծրագրային փոփոխություններ չեն կատարել», - ասաց նա՝ ավելացնելով՝ տնտեսվարողները զգուշացվել են, որ կատարեն անհրաժեշտ փոփոխությունները: «Սա որակում ենք միտումնավոր կամ ոչ միումնավոր չարաշահում», - ասաց Կոտոլյանը:

Վարչապետին հետաքրքում էր, թե որքանով դա կարող է կապված լինել գազալցակայանների ստվերի և չարաշահումների դեմ պայքարի հետ և տնտեսվարողներն իրենց դժգոհությունը հայտնելու համար այսպիսի «իրենց խելքով» պրովոկացիոն գործողությունների են գնում: ՊԵԿ նախագահ Դավիթ Անանյանն արձագանքեց՝ հնարավոր է։

Աղբյուր` Փաստինֆո