Փաստ ինֆո

Դատավոր Գագիկ Հեբոյանին ենթադրյալ կաշառքի գումարը փոխանցելու մեջ կասկածվող փաստաբանը ձերբակալվել է: Այս մասին «Փաստինֆո»-ն տեղեկացավ ՀՔԾ մամուլի խոսնակ Մարինա Օհանջանյանից:

«Փաստինֆո»-ի տեղեկություններով` կասկածյալի կարգավիճակ ունի նաեւ ենթադրյալ կաշառքը տված քաղաքացին, ինչը ճշտող մեր հարցին ի պատասխան` Օհանջանյանն ասաց, որ այս պահին այլ մանրամասներ չեն հաղորդվում:

Փաստաբանների պալատի մամուլի խոսնակ Հայկ Հակոբյանը մեզ հետ զրույցում նշեց, որ իրենք ձերբակալման մասին արդեն ծանուցվել են: Նա հաստատեց նաև, որ խոսքը փաստաբան Վահագն Դանիելյանի մասին է:

Հիշեցնենք, որ փաստաբանի ձերբակալման որոշման մասին «Փաստինֆո»-ն տեղեկացրել էր 03.04.2019 թ.-ին՝ նշելով, որ որոշման կատարումը հանձնարարվել է ոստիկանությանը։ Հաջորդ օրը ՀՔԾ-ն պաշտոնապես հաստատել էր, որ նման որոշում է կայացվել:

«Դատավորի վերցրած գումարը ոչ թե կաշառք է եղել, այլ իր պարտքի մի մասը». պաշտպան

Ավելի վաղ հայտնել ենք, որ Կոտայքի մարզի ընդհանուր իրավասության դատարանի դատավոր Գագիկ Հեբոյանին մեղադրանք էր առաջադրվել ՀՀ քրեական օրենսգրքի 311-րդ հոդվածի 4-րդ մասի 2-րդ և 3-րդ կետերով՝ փաստաբանի օժանդակությամբ առանձնապես խոշոր չափերով կաշառք ստանալու համար: Ըստ ԱԱԾ հաղորդագրության՝ կաշառքի գումարը հանցակից փաստաբանի միջոցով փոխանցվել էր դատավորին, որից անմիջապես հետո այն հայտնաբերվել էր վերջինիս մոտ եւ վերցվել:

Հեղինակ` Միլենա Խաչիկյան