Փաստ ինֆո

«Երբ մարդիկ կռվում են միմյանց հետ, ապա այդ անվստահության ֆոնի վրա անհնար է ժողովրդին խաղաղության պատրաստել»,- լրագրողների հետ հանդիպման ժամանակ այսօր հայտարարեց քաղաքական վերլուծաբան Վիգեն Հակոբյանը՝ ավելացնելով. «Իմ կարծիքով ամենաշատը, որ այսօր կարող էին պայմանավորվել Նիկոլ Փաշինյանն ու Իլհամ Ալիևը, հենց մարդասիրական խաղաղ գործողությունների վերաբերյալ հարցն էր, որն ամրագրված էր նաև ԵԱՀԿ Մինսկի խմբի համանախագահների հայտարարության մեջ,  մնացյալն ուղղակի իլյուզիաներ են»։

Ադրադառնալով ԼՂ հակամարտության կարգավորման Վիեննայի և Սանկտ Պետերբուրգի պայմանավորվածություններին՝ ապա վերլուծաբանը կարծիք հայտնեց, որ դրանք ոչ թե   Մինսկի խմբի համանախագահներն են մոռացության մատնել, այլ հայկական կողմը դրանք չի մղել առաջին պլան։ Նրա կարծիքով՝ ներկայումս առաջնային է համարվում  Դուշանբեի բանավոր պայմանավորվածությունը, որն ամեն դեպքում ինստիտուցիոնալ չէ. բացակայում է փաստաթղթային  պայմանավորվածությունը։  Քաղտեխնոլոգը չբացառեց նաև, որ հնարավոր է հայկական կողմը Վիեննայի և Սանկտ Պետերբուրգի  պայմանավորվածությունները համարում է իր պահեստային տարբերակներից մեկը, այսինքն, քանի դեռ Դուշանբեի՝ իրար վրա չկրակելու պայմանավորվածությունը գործում է  մյուս այդ երկու պայմանավորվածությունների մասին չի հիշատակում։ Վերլուծաբանի կարծիքով, ժամանակի ընթացքում Վիեննայի և Սանկտ Պետերբուրգի պայմանավորվածությունները փոփոխության կենթարկվեն և ավելի կարդիականացվեն, քանի որ դրանք կարևոր ձեռքբերում էին ապրիլյան պատերազմից հետո։   

Նրա խոսքով, կար մի շրջան, երբ միջազգային որոշ կազմակերպություններ ասում էին, որ եթե երկու երկիր ունենան ընդհանուր տնտեսական բիզնես շահեր, ապա նրանց համար քաղաքականությունը երկրորդ պլան կմղվի։ «Իմ խորին համոզմամբ դա ևս իլյուզիա է, մեկ - երկու ամիս հանգիստ վիճակ պահպանելը հնարավոր է,բայց ամեն մի կրակոց, որ հնչում է, ամեն մի զինվոր, որ զոհվում է, կրկին բերում է անվստահության մթնոլորտի»։

Վիգեն Հակոբյանի կարծիքով, վերջ ի վերջո հնարավոր չէ լուծել իրական խնդիրներ՝ առանց ռեալ քայլեր ձեռնարկելու։ «Քանի դեռ չկան քաղաքական որոշման ծիլեր, ռեալ քայլեր, չեմ կարծում, որ մարդասիրական առումով ինչ-որ իրական խնդիրներ հնարավոր կլինի լուծել։ Երբ մարդիկ երկուսով միմյանց դեմ կռվում են, խոսել նրա մասին, որ եկեք կռվելու ընթացքում իրար հետ մի հատ էլ տուն կառուցենք՝ հնարավոր չէ»,- ասաց բանախոսը։  

Աղբյուր` Փաստինֆո