Փաստ ինֆո

Մոսկվայում  հետաքննում են քաղաքի արևմուտքում տեղի ունեցած տարօրինակ սպանությունը: Երեքշաբթի երեկոյան, ապրիլի 2-ին, անհայտ տղամարդը՝ բժշկական դիմակով և գլխարկով հարձակվել է թոշակառու կնոջ վրա: Այդ մասին գրում է «Комсомольская правда»-ն:  Հարձակվողը զինված  է եղել դանակով:

«Դատելով տեսախցիկների տեսագրություններից՝ տղամարդը ակնհայտորեն սպասում էր իր զոհին»,- տեղեկացնում է «КП»-ն՝ հղում անելով իրավապահ մարմինների իր աղբյուրների վրա։  «Նա մի քանի ժամ հերթապահել է Կարինայի տան մուտքի մոտ՝ Կուտուզովսկի պրոսպեկտի վրա: Նկատելով զոհին՝ վրա է հասել և դանակի հարվածներ հասցրել պարանոցի և կրծքավանդակի շրջանում: Կինը փորձել է փախչել, թաքնվել մուտքում ու ստացել ևս մի քանի հարված մեջքին»,- նշում է պարբերականը:

Տղամարդը փախուստի է դիմել: Կինը մահացել է տեղում՝ արյան մեծ կորստից՝  մինչև շտապ օգնության հասնելը:

«КП»-ի տվյալներով՝  57-ամյա Կարինա Վարդանովան զբաղեցրել է ոչ բարձր պաշտոններ Կռիլատսկի և Ֆիլի-Դավյդկովո  մարզերի վարչակազմերում:

Պարբերականի աղբյուրի խոսքերով, սպանությունն առաջին հայացքից բավական տարօրինակ է:

«Մարդասպանը ոչինչ չի փնտրել ու ոչինչ չի վերցրել զոհի մոտից: Կինն արդեն քանի տարի է, ինչ կենսաթոշակառու է: Չի աշխատում, չունի բիզնես: Այս պահին ստուգվում են բոլոր վարկածները՝ ներառյալ մասնագիտական կապերը, բայց  պատճառները դեռևս անհասկանալի են: Հնարավոր են որևէ գույքային վեճեր »,- հաղորդել  է պարբերականի զրուցակիցը:

Քննչական կոմիտեն հարուցել է քրեական գործ «Սպանություն» հոդվածով:

Աղբյուր` Փաստինֆո