Փաստ ինֆո

ՀՀ դատախազությունը, արձագանքելով ԱԺ պատգամավոր Նաիրա Զոհրաբյանի այսօրվա ֆեյսբուքյան գրառմանը, հայտնել է, որ Գյումրու դպրոցի տնօրենի նկատմամբ կալանքը որպես խափանման միջոց ընտրելու առավել քան բավարար հիմքեր կան: Այս մասին «Փաստինֆո»-ն տեղեկացավ Դատախազության հանրային կապերի բաժնի պետ Արեւիկ Խաչատրյանից:

Նրա փոխանցմամբ՝ քրեական գործով արդեն իսկ տվյալներ կան տնօրենի կողմից դատավարությանը մասնակցող անձանց վրա տարբեր ձևերով անօրինական ազդեցություն գործադրելու, գործի համար էական նշանակություն ուենցող նյութեր թաքցնելու վերաբերյալ, և մեծ է հավանականությունը, որ այդ ամենը կարող է շարունակություն ունենալ նրա՝ ազատության մեջ գտնվելու պայմաններում. «Այս պահին միայն կարող ենք ասել, որ կալանքի տակ գտնվող տնօրենը իր ընտանիքի անդամների, մանկահասակ երեխայի հետ տեսակցելու որևէ խնդիր չունի, քանի որ տեսակցությունների վրա արգելք չկա դրված»:

Արեւիկ Խաչատրյանը նշեց նաեւ, որ երբ կալանավորման հիմք հանդիսացող հանգամանքները վերացած կլինեն, այն ժամանակ կքննարկվի տվյալ խափանման միջոցը փոխելու հարցը:

Հիշեցնենք, որ ԱԺ պատգամավոր Նաիրա Զոհրաբյանը այսօր ֆեյսբուքյան գրառում էր կատարել, որում դիմել էր գլխավոր դատախազ Արթուր Դավթյանին՝ խնդրելով հաշվի առնել Գյումրում կալանավորված տնօրենի մանկահասակ երեխայի առկայության փաստը եւ փոխել նրա նկատմամբ խափանման միջոց ընտրված կալանավորումը:

«Պարոն գլխավոր դատախազ, միասի՛ն անենք այդ քայլը». Նաիրա Զոհրաբյանը՝ Արթուր Դավթյանին

Հեղինակ` Միլենա Խաչիկյան