Փաստ ինֆո

Կոտայքի մարզի ընդհանուր իրավասության դատարանի դատավոր Գագիկ Հեբոյանի պաշտպան Կրոմվել Գրիգորյանը բողոքարկել է իր պաշտպանյալին կալանավորելու մասին դատարանի որոշումը: Այս մասին «Փաստինֆո»-ն տեղեկացավ փաստաբանից։ Նշենք, որ դատարանը, բավարարելով դատավորի նկատմամբ որպես խափանման միջոց կալանավորումն ընտրելու մասին միջնորդությունը, նշել է՝ թե նա լինելով 20 տարվա դատավոր կարող է անօրինական ազդեցությունը ունենալ քննության ընթացքի վրա, սակայն որոշման մեջ բացակայում է այդօրինակ ենթադրության հիմքը։ Ավելին՝ փաստաբանի դիտարկմամբ՝ քրեական գործում առկա չէ նաեւ հիմնավոր կասկածը։

Ավելի վաղ տեղեկացրել ենք, որ Կոտայքի մարզի ընդհանուր իրավասության դատարանի դատավոր Գագիկ Հեբոյանին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 2-րդ և 3-րդ կետերով՝ փաստաբանի օժանդակությամբ ստացել է առանձնապես խոշոր չափերով կաշառք ստանալու համար:

Ըստ առաջադրված մեղադրանքի` դատավորն իր վարույթում քննվող քաղաքացիական գործով հայցվորի օգտին գործողություն կատարելու, այն է` վերջինիս 3.400.000 ՀՀ դրամ պետական տուրքը վճարելուց ազատելու դիմաց 2019թ. մարտի 4-ին նրանից պահանջել է առանձնապես խոշոր չափերի` 1.715.000 ՀՀ դրամին համարժեք` 3500 ԱՄՆ դոլար կաշառք:

Քաղաքացու հետ սակարկելու արդյունքում Գ. Հեբոյանը նրա հետ վերջնական պայմանավորվածություն է ձեռք բերել հիշյալ գործողությունը կատարելու դիմաց 1.225.000 ՀՀ դրամին համարժեք 2500 ԱՄՆ դոլար կաշառք ստանալու վերաբերյալ: Խուսափելով կաշառքի առարկան անձամբ վերցնելուց և բացահայտվելուց` դատավորը դիմել է իր ծանոթ փաստաբանի օժանդակությանը. 2019թ. մարտի 27-ին հիշյալ քաղաքացին ԱԱԾ-ի կողմից իրականացված օպերատիվ-հետախուզական միջոցառման շրջանակներում 2500 ԱՄՆ դոլար կաշառքի գումարը տվել է փաստաբանին, ով նույն օրը այն փոխանցել է դատավորին:

Դեպքի առթիվ ԱԱԾ-ում հարուցվել էր քրեական գործ, դատավորը վերցվել արգելանքի եւ քրեական գործն ուղարկել ՀՔԾ՝ նախաքննության։

Աղբյուր` Փաստինֆո