Փաստ ինֆո

«Փաստինֆո»-ն շարունակում է ներկայացնել, թե 2008 թ. մարտի 1-ին տեղի ունեցած զանգվածային անկարգությունների ժամանակ 10 զոհերից յուրաքանչյուրն ինչ հանգամանքներում է ստացել կյանքի հետ անհամատեղելի մարմնական վնասվածքները:

Գրիգոր Գեւորգյան՝ ծնված 30.05.1980 թվականին Երևան քաղաքում, նախկինում չդատված, անկուսակցական, աշխատել է «SPS» բենզալցակայանում` որպես հերթափոխի պետ։

2008թ. մարտի 1-ին` ժամը 21-ի սահմաններում, նրա դին տեղափոխվել է ՀՀ ԱՆ դատաբժշկական փորձաքննությունների գիտագործնական կենտրոն՝ գլխի շրջանում հրազենային վնասվածքներով: Դիակի դատաբժշկական փորձաքննության եզրակացության համաձայն՝ Գրիգոր Գևորգյանի դիակի քթի մեջքին հայտնաբերվել է հրազենային մուտքի 0,5x0,4սմ ձափերի անցք, ձախ ճակատա-գագաթային շրջանում` ելքի անցք, ուղեղանյութի ջնջխում` ուղեղանյութի արտանկումով, կարծր թաղանթի վնասվածք, որոնք հետևանք են գնդակով լիցքավորված հրազենից արձակված կրակոցի ներգործության: Մահվան պատճառ է հանդիսացել գլխուղեղի կենսական կարևորագույն ֆունկցիաների սուր խանգարումը:

Ոստիկանների կիրառած հատուկ միջոցների հետեւանքով ջնջխված բեկորային վնասվածք է ստացել Գր.Լուսավորիչ և Մաշտոցի պողոտայի խաչմերուկում ու մահացել արյան կորստից

Նախնական քննության տվյալներով՝ Գրիգոր Գևորգյանը հրազենային վնասվածքն ստացել է 2008թ. մարտի 1-ին` ժամը 21-ի սահմաններում՝ Լեո և Պարոնյան փողոցների խաչմերուկում գտնվող կոշիկի վերանորոգման կրպակի դիմաց, որտեղից նրան նախ տեղափոխել են Զաքիյան փողոց, ապա շտապօգնության ավտոմեքենայով՝ բժշկական կենտրոն: Հիշյալ հանգամանքը պարզվել է հարցաքննված շուրջ 20 անձանց, այդ թվում՝ շտապօգնության ավտոմեքենայի վարորդ Մարտին Մարտիրոսյանի, բուժքույր Դոնարա Զաքարյանի, ինչպես նաև՝ Գրիգոր Գևորգյանի ծանոթ (նույն թաղի բնակիչ) Ռոբերտ Սիմոնյանի ցուցմունքներով, լուսանկարով ճանաչման ներկայացնելու արձանագրությունով, Մարտին Մարտիրոսյանի մասնակցությամբ` Գրիգոր Գևորգյանի դիակը շտապօգնության մեքենան տեղադրելու վայրի զննության արձանագրությամբ:

Քննությամբ պարզվել է նաեւ, որ Գրիգոր Գևորգյանը ժամը 20-ի սահմաններում զանգվածային անկարգությունների կատարման վայր է գնացել Ռոմիկ Բաղդասարյանի հետ, սակայն ժամը 21-ի սահմաններում կորցրել են միմյանց։

2008 թվականին ՀՀ ոստիկանությանը և ազգային անվտանգության ծառայությանը տրվել են հանձնարարություններ` Գրիգոր Գևորգյանի վիրավորվելուն ականատես անձանց, մեղավորի ինքնությունը պարզելու և նրան հայտնաբերելու ուղղությամբ օպերատիվ միջոցառումներ ձեռնարկելու վերաբերյալ:

Թեեւ ամիսներ առաջ՝ 2018 թվականի օգոստոսի 17-ին ՀՀ վարչապետ Նիկոլ Փաշինյանը հայտարարեց, որ «Մարտի 1-ի գործը, ըստ էության, բացահայտված է», սակայն հանրությանն առայժմ հայտնի չէ թե իշխանափոխությունից հետո ինչ նոր հանգամանք է պարզվել, հայտնաբերվել է արդյոք հրազեն կիրառած անձը։ Համենայն դեպս՝ Գ.Գեւորգյանի սպանության համար որեւէ մեկին մեղադրանք առաջադրվելու մասին պաշտոնական հաղորդագրություն չի տարածվել։

Շարունակելի

Աղբյուր` Փաստինֆո