Փաստ ինֆո

Կոնստանտին Հովհաննիսյանի գործով կայացվել է աննախադեպ խայտառակ դատական ակտ ։ «Փաստինֆո»-ի թղթակցի հետ զրույցում ասել է Կ.Հովհաննիսյանի պաշտպան, փաստաբան Սուսաննա Սարգսյանը՝ նշելով, որ ընդհանուր իրավասության դատարանի որոշման դեմ ներկայացրել են վերաքննիչ բողոք։

Հիշեցնենք, որ Կոնստանտին Հովհաննիսյանը բերման է ենթարկվել մարտի 12-ին, ում հետագայում մեղադրանք է առաջադրվել խարդախության և փաստաթղթեր կեղծելու համար: Նրա նկատմամբ որպես խափանման միջոց է ընտրվել կալանավորումը եւ սա այն դեպքում, երբ Կ. Հովհաննիսյանը վերջերս էր երիկամի փոխպատվաստման ենթարկվել։ Բացի այդ՝ տառապում է ինսուլինակախյալ շաքարային դիաբեթով, գրեթե կույր է և օրական ընդունում է 120-270 միավոր ինսուլին: Այս փաստերը, սակայն, չեն խանգարել դատարանին ոչ միայն բավարարել կալանավորման միջնորդությունը, այլ նաեւ մերժել գրավի կիրառումը։ «Մենք դատարանին առաջարկել ենք կալանքը փոխարինել գրավով՝ գումարի չափը նշելով 2 մլնն դրամ և ասել, որ Կ. Հովհաննիսյանի ընտանիքը հնարավորություն ունի 2 միլիոնի, բայց եթե գտնեք, որ Կ. Հովհաննիսյանի պատշաճ վարքագիծն ապահովելու համար ավելի մեծ չափով գրավ է պետք, խնդրեմ համեցեք և ասեք չափը ու թող ընտանիքը մտածի»,- նշեց Կ. Հովհաննիսյանի փաստաբան Սուսաննա Սարգսյանը:

Նրա խոսքով՝ հաջորդ օրը եւս գրավի միջնորդություն են ներկայացրել՝ որպես գրավ առաջարկելով գույք, որի շուկայական արժեքը գնահատվում է 14 միլիոն 500 հազար ՀՀ դրամ,սակայն դատարանը գտել է, որ այդ գումարը բավարար չէ Հովհաննիսյանի պատշաճ վարքագիծը ապահովելու համար:

«Ուրեմն ի՞նչ է ստացվում. 5 տոկոսանոց մարդը այս պետության համար փաստացի ավելի՞ վտանգավոր հանցագործ է, քա՞ն Մայրապետյանը, Խաչատուրովը, որին կարելի է վերագրել աշխարհի բոլոր մեղքերը: Փաստորեն այդ մարդիկ ավելի նվազ վտանգավոր են, ավելի նվազ հանրային շահ կա այդտեղ, քան Կոնստանտին Հովհաննիսյանի դեպքում»,- ասում է Սուսաննա Սարգսյանը և հավելում ՝ «բերեք մի հատ էլ ցմահ ազատազրկում նախատեսող հոդված առաջադրենք ու պրծնենք գնանք, մեկա էդ մարդը էսօր կա վաղը չկա»:

Սուսաննա Սարգսյանը վերաքննիչ բողոք է ներկայացրել՝ Երեւանի ընդհանուր իրավասության դատարանի որոշման դեմ։ Փաստաբանի որակմամբ՝ սա աննախադեպ խայտառակ դատական ակտ է, և չնայած նրան,որ դատավոր Դավիթ Հարությունյանը փաստաբանների շրջանում հայտնի է իր օբյեկտիվությամբ,այնուամենայնիվ այս պարագայում նրա կայացրած որոշումն անհասկանալի է:

Սուսաննա Սարգսյանի խորին համոզմամբ՝ ԱԱԾ-ն և ՀՔԾ-ն պետք է լուրջ զբաղվեն դատավորների վախերի աղբյուրներով: «Եթե դատավորը վախենում է ԱԱԾ-ից և կալանքի որոշում է տալիս, ուրեմն այդտեղ մի բան այն չէ: Այնպես չէ, որ ԱԱԾ-ի սրտով գնալու համար կալանքի որոշում կայացնելուց հետո անցնում, գնում ենք: Հարգելի դատավոր ինչու ես օրենքը շրջանցում, ինչու ես ապօրինի դատական ակտ կազմում»:

Հեղինակ` Առաքել Տոնոյան