Փաստ ինֆո

Հայաստանի հետ բանակցային գործընթացի ձևաչափը մնում է անփոփոխ, բանակցություններում առաջընթաց կա։ Այդ մասին հայտարարել է Ադրբեջանի նախագահ Իլհամ Ալիևը՝ մարտի 29-ին պատասխանելով ТАСС-ի հարցին։

«Բանակցային գործընթացը պետք է ուղեկցվի նաեւ հումանիտար ակցիաներով։ Կարևոր է այն, որ բանակցությունների ձևաչափը մնացել անփոփոխ, բանակցությունները ընթանում են Հայաստանի և Ադրբեջանի միջև, ինչպես որ եղել է շատ տարիներ,- ասել է նախագահ Ալիևը,- բանակցային գործընթացին նոր ազդակ է տրվել, մենք շատ դրական ենք գնահատել ԵԱՀԿ Մինսկի խմբի համանախագահների` մարտի 9-ի հայտարարությունը, որում ասվում է, որ բանակցային գործընթացի փոփոխություն կարող է լինել միայն 2 կողմի համաձայնությամբ»։

Նրա խոսքերով՝ Բաքուն դրա համար իր համաձայնությունը չի տվել։ «Հանձնարարություն է տրվել արտգործնախարարներին եւ, ամենայն հավանականությամբ, նրանք մոտ ժամանակներս կհանդիպեն՝ բանակպային պրոցեսը շարունակելու համար»-, ասել է Ալիեւը։

«Բանակցային գործընթացը պետք է միտված լինի արդյունքին։ Ադրբեջանի համար առաջին տեղում է Ադրբեջանի` միջազգային իրավունքի շրջանակներում, Հելսինկյան եզրափակիչ ակտի և ՄԱԿ-ի անվտանգության խորհրդի 4 բանաձևերի շրջանակներում միջազգայնորեն ճանաչված տարածքների ապաօկուպացիան, որոնք պահանջում են հայկական ուժերի անհապաղ ու անվերապահ դուրսբերումը օկուպացված տարածքներից»,- նշել է Ալիևը։

Ադրբեջանի նախագահի խոսքերով` բանակցությունները ընթացել են կառուցողական մթնոլորտում։ «Բանակցությունները դրական ենք գնահատում, դրանք անցել են կառուցողական մթնոլորտում»,- ասել է Ալիեւը։

Աղբյուր` Փաստինֆո