Փաստ ինֆո

ՀՀ վարչապետ Նիկոլ Փաշինյանը դեռ չի ընդունել գրավատների և փոխանակման կետերի աշխատակիցներին։ «Պետական տուրքի մասին» օրենքում փոփոխությունների դեմ իրականացվող բողոքի ակցիան կվերսկսվի երկուշաբթի։  այդ մասին «Փաստինֆո»-ի թղթակցին ասել է Հայաստանի ֆինանսավարկային կազմակերպությունների խորհրդատվական կենտրոնի ղեկավարի օգնական Տաթևը՝ ընդգծելով, որ ցույցերը կշարունակվեն այնքան ժամանակ մինչև աշխատակիցները հանդիպեն վարչապետին։

«Պետտուրքի բարձրացման հետևանքով գրավատների 90%-ը կփակվեն և, քանի որ, ժողովուրդը այլընտրանք չի ունենա և ստիպված պետք է դիմի բանկ կամ վարկային կազմակերպություն, այդ պատճառով արդեն խոսակցություններ կան, որ վարկային կազմակերպությունները արդեն իսկ ավելի են բարձրացնում իրենց տոկոսները», - ասաց մեր զրուցակիցը:

Նրա խոսքերով՝ նման պետտուրք սահմանելու դեպքում տնտեսվարողները, որ տարիներ շարունակ ստեղծել են իրենց համար աշխատանք, բացել են աշխատատեղեր հազարավոր մարդկանց համար, փակվելու դեպքում բոլորը կդառնան գործազուրկ:  Տաթեւի կարծիքով՝ պետական մարմինները վարչապետին սխալ տվյալներ են հաղորդում: Ասում են՝ 129 գրավատուն միասին 17 բանկի չափ պետբյուջե գումար չի վճարել: Չէր էլ կարող վճարել: Ի տարբերություն բանկերի՝ գրավատների գործառույթները սահմանափակ են: Եթե մեր վճարումները համեմատում են բանկերի հետ, այդ դեպքում թող տուրքերն էլ բարձրացնեն այնքան, որքան բանկերինն են բարձրացնում:

Նրա փոխանցմամբ՝ գրավատների և փոխանակման կետերի իրավաբանական խորհրդատվությամբ և շահերի պաշտպանությամբ զբաղվող կառույցի ներկայացուցչի խոսքով Գրավատները չեն տրամադրում գյուղացիական վարկեր, հիփոթեքային վարկեր, ոչ արտարժույթով վարկեր: Գրավատները տրամադրում են վարկեր միայն ֆիզիկական անձանց, միայն շարժական գույքի գրավադրմամբ,որը շատ փոքր գործառույթ է բանկերի ու վարկային կազմակերպությունների հետ համեմատած: Բայց չգիտես ինչու որոշվել է ամենաբարձր պետտուրքը սահմանել գրավատներ ու արտարժույթի փոխանակման կետերի համար:

Անդրադառնալով ակցիայի մասնակիցների և կառավարության ներկայացուցիչների միջև տեղի ունեցած վերջին քննարկմանը, Տաթևը նշեց, որ առաջարկել են առաջին տարին վճարել 500հազ., երկրորդ տարին՝ 2 միլիոն, երրորդ տարին՝ 6 միլիոն, ինչը գործելու է միայն գործող գրավատների համար, իսկ նոր բացվող գրավատները միանգամից կվճարեն 6 միլիոն դրամ: «Դա խելքին մոտ թիվ չէ, շատ գրավատներ անգամ 1 միլիոնի դեպքում կփակվեն»,- պնդեց մեր զրուցակիցը:

նա նշեց, որ բողոքի ակցիա իրականացնողներից ոչ մեկ դեմ չէ, որ պետական տուրքի հետ կապված փոփոխություն լինի: Պարզապես ուզում են, որ այդ ամենն իրականացվի ճիշտ, - «Կա՛մ թող տնտեսական աճով բարձրացնեն, կա՛մ հիմնավորեն, թե ինչ ցուցանիշների հիման վրա են որոշվել պետտուրքը բարձրացնել արտարժույթի փոխանակման կետերի համար 3միլիոն, իսկ գրավատների համար 6 միլիոն»:

Հարկային օրենսգրքի նոր փոփոխությունների փաթեթով կառավարությունը նախատեսում է գրավատների և տարադրամի փոխանակման կետերի տարեկան պետտուրքն ավելացնել 60 անգամ՝ 50 հազար դրամը դարձնելով 3 միլիոն, 100 հազարը՝ 6 միլիոն:

Աղբյուր` Փաստինֆո