Փաստ ինֆո

Արցախ մեկնած պատգամավորների վերադարձից հետո քվորումն ապահովվեց եւ ԱԺ արտահերթ նիստը շարունակվեց, որի ժամանակ էլ սահմանադրական երկու օրենքներում փոփոխությունների փաթեթն ընդունվեց՝ երեք խմբակցությունների միասնական կողմ դիրքորոշմամբ:

Հիշեցնենք՝ խոսքը ԱԺ արտահերթ նիստի օրակարգում ընդգրկված «Ազգային ժողովի կանոնակարգ» և «Սահմանադրական դատարանի մասին» ՀՀ սահմանադրական օրենքներում փոփոխություններ կատարելու մասին նախագծերի մասին էր:

Այս նախագծերի ընդունման վերջնաժամկետ Սահմանադրական դատարանը սահմանել էր մինչև ապրիլի 1-ը, հակառակ դեպքում, ըստ մասնագետների, կարող է առաջանալ իրավական վակուում։

Նշենք, որ այսօրվա նիստում եւս «Լուսավոր Հայաստան»,  «Բարգավաճ Հայաստան» խմբակցությունները պնդեցին, որ իրենք կողմ են քվեարկում նախագծին՝ ելնելով այն դիրքորոշումից, որ իրավասու մարմինները ՍԴ դատավորի միևնույն թեկնածուին կարող են առաջադրել միայն մեկ անգամ: Սակայն օրենքների նախագծերի հիմնական զեկուցող Արտակ Զեյնալյանը պնդմամբ՝ մերժվելու դեպքում միևնույն թեկնածուին մի քանի անգամ ներկայացնելու սահմանադրական արգելք չկա: 

Նկատենք, որ «Իմ քայլը» խմբակցության պատգամավոր Վահագն Հովակիմյանը քվեարկությունից առաջ հայտարարեց, որ չի քվեարկելու, քանի որ իր համար անորոշ է ստեղծված իրավիճակը:

«Ինձ համար շատ կարևոր է, որ մենք չընդունենք սահմանադրական օրենք, որը կարող է մեր մյուս գործընկերների կողմից այլ կերպ մեկնաբանվել, այլ կերպ շահարկվել», - ասաց Հովակիմյանը:Նրա օրինակին հետեւեցին նաեւ այլ պատգամավորներ, որոնց թվում Հովհաննես Իգիթյանը, Էդգար Առաքելյանը, Թագուհի Թովմասյանը, Արսեն Ջուլֆալակյանը:

Աղբյուր` Փաստինֆո