Փաստ ինֆո

Ամուլսարի գործով անկախ փորձաքննության արդյունքները կլինեն մայիս-հունիս ամիսներին։ Այս մասին լրագրողներին այսօր ասել է ՀՀ բնապահպանության նախարար Էրիկ Գրիգորյանը:

«Մայիսին նախնական արդյունքները կլինեն», - ասաց նա: Վերջինիս խոսքերով՝ միջազգային փորձագետներն այս օրերին տարաբնույթ հանդիպումներ և աշխատանքներ են իրականացնում ու ներկայացնում մեթոդաբանությունն՝ ինչպես են աշխատելու։

«Գործընթացն իր հունով է գնում և կտա եզրակացություն: Այս գործընթացը հարուցված քրգործի շրջանակներում է: Քննչական մարմինը հարուցված քննչական գործի շրջանակներում վարձել է միջազգային կազմակերպությանը, որ կատարի ուսումնասիրություն: Բացի այս կազմակերպությունից, տեղական բազմաթիվ փորձագետներ են ներգրավված այդ փորձաքննություններում», - նշեց Գրիգորյանը:

Նա ընդգծեց, որ ընկերությանը ևս եղել է առաջարկ մասնակցել փորձաքննությանը, սակայն Լիդիանը բացասական պատասխան է տվել՝ նշելով, որ իրենք ունեն բոլոր թույլտվությունները և իրավունք ունեն աշխատանք իրականացնել:

Ինչպես արդեն տեղեկացրել ենք՝ միջազգային փորձաքննությունն իրականացնելու է «ԷԼԱՐԴ» ընկերությունը, որի տնօրենին այսօր ընդունել է ՔԿ նախագահ Հայկ Գրիգորյանը։ Ըստ ՔԿ-ի հաղորդագրության՝ Ամուլսարի ոսկեբեր քվարցիտային հանքի շահագործման նպատակով նշանակված համալիր փորձաքննությունների ժամկետները և գործողությունների հաջորդականությունը, մինչդեռ նախարարն արդեն գիտի, թե երբ կլինի նախնական եզրակացությունը։

Փորձաքննությունը կարժենա 396 հազար դոլար, որ կառավարությունը փետրվարի 21-ի նիստում որոշեց տրամադրել ՀՀ քննչական կոմիտեին։

Քրեական գործը, որի շրջանակներում նշանակվել է միջազգային փորձաքննությունը հարուցվել է 7-8 ամիս առաջ՝ ՀՀ քրեական օրենսգրքի 282-րդ հոդվածի 1-ին մասով՝ Շրջական միջավայրի աղտոտման վերաբերյալ տեղեկություններ թաքցնելը կամ դրանք դիտավորյալ աղավաղելը։ Ըստ նախնական տվյալների՝ ՀՀ բնապահպանության նախարարության համապատասխան պաշտոնատար անձինք, տեղեկացված լինելով նշված համալիրի շահագործման դեպքում շրջակա միջավայրի քիմիական աղտոտման վտանգավոր ռիսկերի մասին, բնակչությունից դիտավորությամբ թաքցրել են մարդկանց կյանքի և առողջության համար վտանգավոր քիմիական նյութերով շրջակա միջավայրի աղտոտման վերաբերյալ տեղեկությունները:

«Փաստինֆո»-ի հարցին ի պատասխան քննչական կոմիտեից պարզաբանել են, որ մեղադրանք որեւէ մեկի դեռ չի առաջադրվել՝ նշելով, որ փորձաքննությունը նոր է նշանակվել։

Ինչպես նշեցինք՝ քրեական գործը հարուցվել է բնապահպանության նախարարության համապատասխան պաշտոնատար անձանց կողմից մարդկանց կյանքի և առողջության համար վտանգավոր քիմիական նյութերով շրջակա միջավայրի աղտոտման վերաբերյալ տեղեկությունները թաքցնելու համար։ Ասել է թե՝ նրանք իրենց պաշտոնավարման ժամանակ ունեցել են նման տվյալներ ու չեն հայտնել այդ մասին։

Իսկ նշանակված էկոլոգիական, երկրաբանական, հիդրոլոգիական, երկրաֆիզիկական, նյութագիտական, հողագիտական, քիմիական, տեխնոլոգիական, շինարարատեխնիկական և տնտեսագիտական համալիր փորձաքննությամբ պետք է նոր պարզվեն Ամուլսարի ոսկեբեր քվարցիտային հանքավայրի շահագործման հետևանքով շրջակա միջավայրի (հող, օդ, ջուր, բուսական, կենդանական աշխարհ) վրա վնասակար ազդեցության ռիսկերը, դրանց կանխարգելմանն ուղղված միջոցառումների հիմնավորվածությունը։ Ասել է թե՝ քրեական գործի հարուցումից միայն մոտ 1 տարի անց հնարավոր կլինի ստանալ եզրակացություն պարզելու, թե արդյոք հանքի շահագործում է վնասակար է շրջապատի համար, թե ոչ։ Եթե տեսականորեն տրվի եզրակացություն, ապա պարզ չէ, թե ինչպես պետք է դրան հետադարձ ուժ հաղորդվի եւ բնապահպանության որեւէ պաշտոնյայի մեղադրանք առաջադրվի, որ 2019 թվականի եզրակացությամբ հայտնի դարձած ռիսկերը նախարարության աշխատակցի կողմից ասենք 2018 թվականին գաղտնի են պահվել։ Ակնհայտ է, որ եզրակացությունն ունենալու է առավելապես քաղաքական նշանակություն՝ օգտագործելու  Ամուլսարի շահագործումն արգելել-չարգելելու հարցը լուծելու համար, իսկ թե որքանով քրեական գործով ձեռք բերված ապացույցը կարող է պիտանի լինել քաղաքացիաիրավական հարաբերություններում, ապա դա արդեն բոլորովին այլ հարց է։

Աղբյուր` Փաստինֆո