Փաստ ինֆո

Եթե հոգեբանական հայացքով դիտարկելու լինենք թավշյա հեղափոխության  արդյունքում ակտիվացած որոշ քաղաքական դեմքերի վարքաբանությանը, ապա կտեսնենք, որ նրանք հիշողության կորստով են տառապում: Այդ որոշներից մեկն էլ  Գագիկ Ջհանգիրյանն է,  որն այսօր  «հրեշտակի» դիմակ է հագել, թեպետ ճիշտ և ճիշտ այն գայլին կնմանի, որին գառ են ի պահ տվել:

Այն, որ հենց Գագիկ Ջհանգիրյանն է հիմք դրել ընտրակեղծարարությանը Հայաստանում, կարծում եմ, երկու կարծիք լինել չի կարող: Հակառակ կարծիք կարող են ունենալ, թերևս միայն երիտիշխանավորները՝ այն պարզ պատճառով, որ նրա սերնդակիցը չեն, ծանոթ չեն նորանկախ Հայաստանի պատմության էջերին:

Պատկերացնու՞մ եք հիմնադիր-ընտրակեղծարար Ջահանգիրյանը մանկուրտիզմով է տառապում և համարձակվում է այս բնագծում իրենից ավելի մեղավորի մատնացույց անել՝ մոռանալով, որ  ոլորտի գուրուն է ինքը:

Նրա հիվանդությունն ակնհայտ սրացման նշաններ է ցույց տալիս նաև, երբ խոսք է գնում հոկտեմբերի 27-ի ահաբեկչության փաստի առթիվ հարուցված քրգործի մասին: Մոռանում է, որ հենց իր վարույթում է քննվել Հայաստանի պատմության սարսափելի էջերից մեկի վերաբերյալ քրեական գործը եւ անմիջական մասնակցություն ունեցել այն սարդոստայնի ձեւավորմանը, որից առ այսօր դուրս գալ չի հաջողվում:Որ հենց ինքն է եղել հոկտեմբերի 27-ից անջատված մասով վարույթը կարճելու ջատագովը:

Նկատենք, որ մինչեւ կարճվելը անջատված մասի նախաքննության ժամկետը երկարացվել է 25 անգամ։ 2004թ. նոյեմբերի 11—ին կայացված պատճառաբանված որոշմամբ անջատված մասով քրեական գործի վարույթը կարճվել է։ Մինչ կարճելու մասին որոշում կայացնելը նախաքննության արդյունքները քննարկվել են ՀՀ դատախազության 2004 թվականի նոյեմբերի 9—ին տեղի ունեցած կոլեգիայի նիստում, որին հրավիրվել եւ մասնակցել են «Հոկտեմբերի 27»–ի քրեական գործի եւ դրանից անջատված մասի նախաքննության մեջ ներգրավված բոլոր քննիչները, օպերատիվ աշխատողները, նրանց թվում՝ զինվորական դատախազության քննիչները եւ զինվորական դատախազ Գագիկ Ջհանգիրյանը՝ կոլեգիայի անդամի կարգավիճակով։

Ավելին`քննարկման ժամանակ ելույթ է ունեցել նաեւ զինդատախազ Գագիկ Ջհանգիրյանը եւ ընդգծել քրեական գործի վարույթը կարճելու անհրաժեշտությունը՝ նշելով, որ իրականում «Հոկտեմբերի 27»–ի քրեական գործից մաս անջատելու 2000 թվականի հուլիսի 11—ի որոշումը եղել է անօրինական՝ թելադրված քաղաքական իրավիճակով։

Ըստ նրա՝ 2000 թվականի հուլիսի 11—ի որոշումը նպատակ է ունեցել հանդարտեցնել քաղաքական լարվածությունը, որին ի պատասխան՝ ՀՀ գլխավոր դատախազի տեղակալ, կոլեգիայի անդամ Գ. Դանիելյանը նկատել է, որ այդ որոշումը ճիշտ հակառակ ազդեցությունն է ունեցել եւ քաղաքական լարվածությունն ավելի է սրել։

Կոլեգիայի արձանագրությունը եւ բոլոր նյութերը պահպանվում են, ինչը նշանակում է, Գ. Ջհանգիրյանը ստիպված  է թարմացնել հիշողությունը՝ նախքան խնդրո առարկա որոշմանն անդրադառնալը և մեղավորներ որոնելը: Հոկտեմբերի 27-ի   անջատված մասով քրեական գործի վարույթը կարճելու մասին որոշմանն ինքը կողմ է եղել և հիմնավորել է այն:

Ի դեպ, ազնվության  ու արդարության թեմայով բարոյախոսի դեր ստանձնած  Գ. Ջհանգիրյանին օրերս մի փաստ էլ հիշեցրին լրատվամիջոցները: Այն, որ Մոնումենտի կանաչ տարածքների հաշվին առաջին և  ամենամեծ առանձնատունն իրենն է: Դե իսկ «մասնավոր» մեկուսարանի մասին թերեւս իրենից լավ ոչ ոք չգիտի:

Իսկ նրա, եւ ոչ միայն նրա հիշողությունը թարմացնելու բազմաթիվ դեպքեր եւ դրվագներ կան, որոնց կանդրադառնանք հաջորդիվ:

Հեղինակ` Արթուր Գահնապետյան