Փաստ ինֆո

«Լուսավոր Հայաստան» կուսակցությունն ունի կառավարության կառուցվածքի իր այլընտրանքային տարբերակը։ Ըստ այդմ՝ առաջարկում են ունենալ14 նախարարութունն և երեք փոխվարչապետ ունեցող համակարգ, որոնցում ներառված կլինեն բոլոր մարմինները: Այս մասին այսօր տեղի ունեցած մամուլի ասուլիսում հայտարարեց ԼՀԿ ղեկավար Էդմոն Մարուքյանը՝, որ կառուցվածքային փոփոխությունն առաջարկել են ելնելով այն սկզբունքից, որ այդ փոփոխությունները պետք է վերացնեն սուպերվարչապետությունն ու պառլամենտը գործադիրի նկատմամբ ունենա վերահսկողություն:

«Մենք առաջարկում ենք կառավարության այնպիսի կառուցվածք, որտեղ վարչապետին, կառավությանը ենթակա մարմիններ չեն լինում, բոլորը կառավարության հիմնական կառուցվածքի մեջ են ներառված: Դրանով լուծվում է խորհրդարանական վերահսկողության ու խորհրդարանական երկիր լինելու խնդիրը», - նշեց Մարուքյանը:

ԼՀԿ-ն առաջարկում է պահպանել գյուղատնտեսության ու մշակույթի նախարարությունները։
«Մի երկրում որտեղ ՀՆԱ-ի 16 տոկոսը գյուղատնտեսության ոլորտից է, այդ երկրում գյուղատնտեսությամբ զբաղվող, այլ ոլորտը կանոնակարգող, ոլորտում ազատ մրցակցությունը ապահովող նախարարություն փակելը սխալ է: Գուցե շատ զարգացած գյուղատնտեսություն ունեցող երկրներում կարելի էր սա ազատ թողնել, բայց Հայաստանի պարագայում, մեզ համար ընդունելի չէր փաստարկը, թե նախկինում այն վատ է աշխատել, դե պարզ է, բայց հիմա կարելի է պահպանել նախարարությունն ու նորմալ աշխատել», - ասաց Մարուքյանը:

Սփյուռքի նախարարի հանձնակատարի պարտականությունները առաջարկում են վերապահել փոխվարչապետերից մեկին, ինչը թույլ կտա ապահովվել այդ մարմնի նկատմամբ խորհրդարանական վերահսկողությունը, քանի որ փոխվարչապետը հաշվետու է խորհրդարանին:

Ներկայացրած կառուցվածքով առաջարկվում է ԱԱԾ-ն դարձնել նախարարություն, իսկ ոստիկանությունը ԱԻՆ-ի հետ միավորել մեկ նախարարության մեջ՝ Ներքին գործերի նախարարություն անվան տակ, իսկ Արդարադատության նախարարությունը վերանվանել Իրավական հարցերի նախարարություն, ՊԵԿ-ն էլ ներառել Ֆինանսների նախարարության մեջ:

Մարուքյանը նշեց, որ այսօր նախագիծն ուղարկվել է կառավարություն և քիչ ուշ այն ամբողջական տարբերակով հասանելի կլինի էլեկտրոնային տարբերակով:

Աղբյուր` Փաստինֆո