Փաստ ինֆո

«Բարգավաճ Հայաստան» խմբակցության պատգամավոր Տիգրան Ուրիխանյանն այսօր փորձեց վարչապետ Նիկոլ Փաշինյանից ճշտել, թե արդյոք Հայաստանը կարողանալու՞ է առանց խնդիրների սպասարկել արտաքին պարտքը, եւ արդյոք կարո՞ղ է Հայաստանի Հանրապետությանը սպառնալ դեֆոլտի վտանգ։

Պատգամավորի հարցին ի պատասխան վարչապետը նախ անդրադարձավ ձայնի տոնայնությանը՝ «Չգիտեմ, ինչի՞ եք այդքան թախծոտ ձայնով այդ հարցը տալիս, որովհետև հասկանալի է չէ՞, որ դա նորություն չէ, այսօր չի ծագել, հասկանալի է, որ միջնաժամկետ ծախսերի ծրագրով, բյուջետային պլանավորման ծրագրով այդ ամեն ինչը նախատեսված է»։ Ապա՝ հավաստիացրեց. «Ո՛չ, ձեր նշած որևէ սպառնալիք Հայաստանի Հանրապետությանը չի կարող սպառնալ։ Ո՛չ, անշարժ գույքի գները ոչ թե նվազելու են, այլ բարձրանալու են։ Ո՛չ, պետական բյուջեի եկամուտները ոչ թե նվազելու են, այլ ավելանալու են։ Այս տարի մենք նվազագույնը 40 մլրդ դրամով ավելի գումար ենք հավաքելու պետական բյուջե և մեր տնտեսական ակտիվության ցուցանիշները մեզ հիմնավորում են, որ մենք պետբյուջեի եկամունտները շարունակաբար ավելացնելու ենք՝ տնտեսության աճի ու ստվերային տնտեսության կրճատման հաշվին»։

Արձագանքելով վարչապետին՝ Ուրիխանյանը պարզաբանեց, որ իր ձայնը թախծոտ է, որովհետեւ. «Հարցը տալիս եմ ահռելի պարտքի մասին՝ ժպտում եք, հետո ասում եք՝ «թախծոտ ձայնով»։ Ազգային ժողովի կանոնակարգ օրենքը չի կանոնակարգում ԱԺ պատգամավորի ձայնի ելևէջները, բա պարտքից եմ հարցնում, բյուջեի կեսի չափ պարտք ունենք մարելու, բա թախիծ ա, բա ինչ ա»,-նշեց պատգամավորը։

Աղբյուր` Փաստինֆո