Փաստ ինֆո

Ազգային ժողովի հավաքարարները շարունակում են բողոքի ակցիաները՝ պահանջելով իրենց վճարել նախկին պայմանագրով սահմանված աշխատավարձը։ Այսօր նրանքիրենց բողոքը ներկայացրին Ազգային ժողովի ԲՀԿ–ական փոխնախագահ Վահե Էնֆիաջյանին։

Հավաքարարները պնդում են, որ համաձայն չեն առաջարկվող պայմաններին. «Մենք հանդիպել ենք, մեզ առաջարկում են ստանալ 40 հազար դրամ աշխատավարձ, բայց աշխատել նաեւ այլ տեղերում։ Իմ առողջությունը չի ներում, այդ պատռճառով 22 տարի է այստեղ եմ աշխատում։ Ինձ հաճելի չի ուրիշի ոտքերի տակը ավլելը, բայց եթե ավլում եմ, կարելի է հարգանք դրսեւորել այս խավի նկատմամբ»։

ԱԺ փոխնախագահը խոստացավ հարցը նորից բարձրացնել, սակայն ակնարկելով, որ ԲՀԿ-ն որոշում կայացնող չէ։
«Դուք քաղաքական ինստիտուտում եք աշխատում, գիտեք՝ որ քաղաքական ուժն է որոշողը, ով՝ ինչ մանսակցություն ունի։ Ես այսօր խոստանում եմ ձեր խնդիրը նորից ներկայացնեմ կամ ԱԺ աշխատակազմի ղեկավարին կամ ԱԺ նախագահին»,–ասաց Էնֆիաջյանը։

Հիշեցնենք, որ Ազգային ժողովի մաքրությունն իրականացնող «ՔԼԻՆԵՐՍ» ՍՊ ընկերությունը առաջարկել է մաքրուհիներին աշխատել 40 հազար դրամով նախկին 67 հազար դրամի փոխարեն, սակայն ընկերությունը խոստացել է աշխատանքով ապահովել նաեւ այլ հաստատություններում։ Հավաքարարները սրան դեմ են, սպառնում են ապրիլի 1-ից այլեւս աշխատանքի չգալ, եթե իրենց խնդրին լուծում չտրվի։

Աղբյուր` Փաստինֆո