Փաստ ինֆո

«Պարտեզ» ռեստորանային համալիրի մոտ տեղի ունեցած զինված միջադեպի հետեւանքով երկու անձի սպանությունը մնում է չբացահայտված։ Այս մասին «Փաստինֆո»-ն տեղեկացավ ՀՀ քննչական կոմիտեից։ Նույն աղբյուրի փոխանցմամբ՝ գործով ընդհանուր առմամբ որպես մեղադրյալ է ներգրավվել 21 անձ, որոնցից 7-ի նկատմամբ որպես խափանման միջոց է ընտրվել կալանավորումը։ Մեկ անձ գտնվում է հետախուզման մեջ։

Ավելի վաղ տեղեկացրել ենք, որ Աբովյան քաղաքի Արզնի խճուղում գործող «Պարտեզ» ռեստորանային համալիրի մոտ տեղի ունեցած զինված միջադեպի ժամանակ մահացու հրազենային վնասվածք Էր ստացել 2 անձ՝ ԱԺ նախկին պատգամավոր Մելիք Մանուկյանի ազգականը եւ եղբոր որդու ընկերը։ Վերջինս մահացել էր նույն օրը, իսկ ազգականի կյանքի համար բժիշկները մոտ 10 օր պայքարեցին, սակայն փրկել չկարողացան. տղան վնասվածք ստացել էր գլխի շրջանում։

«Փաստինֆո»-ի հարցին ի պատասխան՝ Քննչական կոմիտեից նշեցին, որ սպանությունների դրվագով մեղադրանքներ չեն առաջադրվել։

Հիշեցնենք, որ զինված հարձակումը տեղի է ունեցել 2019 թվականի հունվարի լույս 29-ի գիշերը։ ԲՀԿ նախագահ Գագիկ Ծառուկյանի որդու կողմնակիցների զինված գնացել են «Պարտեզ» ռեստորանային համալիրի մոտ՝ պարզաբանում պահանջելու ավելի վաղ «Մուլտիտրանսսերվիս» ընկերությանը պատկանող ավտոտեխսպասարկման կենտրոնում տեղի ունեցած միջադեպի համար։ Ինչպես ավելի վաղ «Փաստինֆո»-ն տեղեկացրել է՝ Մելիք Մանուկյանի եղբոր որդին իր ընկերոջ հետ նշված ընկերության ավտոտեխսպասարկման կենտրոնում խնդրել է նորոգել ավտոմեքենայի անիվը, որտեղ տարբեր պատճառաբանություններով՝ աշխատակցի տեղում չլինելու, ապա նաեւ աշխատանքային ժամն ավարտված լինելու պատճառով հրաժարվել են սպասարկել։ Նկատենք, որ նշված ավտոտեխսպասարկումն աշխատացնում են «Բարեց Վահրամ» անունով հայտնի Վահրամ Գրիգորյանն իր երկու եղբայրների հետ, ովքեր հայտնի են Գագիկ Ծառուկյանի միջավայրի հետ իրենց կապերով։ Առաջացել է վիճաբանություն, ինչը վերածվել է քաշքշոցի։ Մելիք Մանուկյանի զարմիկը հեռացել է՝ ուղեւորվելով ռեստորան, որտեղ հավաքված են եղել իրենց այլ հարազատներ եւ ընկերներ։ Բայց հարցը դրանով չի ավարտվել։

Ըստ մամուլում հրապարակված տեղեկությունների՝ քիչ անց տեխսպասարկման կենտրոնի աշխատակիցների համախոհներից մեկը զանգել եւ Մելիք Մանուկյանի քրոջ որդուն առաջարկել է հանդիպել Աբովյանի մարզադպրոցի մոտ, որտեղ չկան տեսանկարահանող սարքեր, ինչը Մելիք Մանուկյանի ազգականները մերժել են։ Ապա տեղեկանալով, որ վերջիններս գտնվում են ռեստորանում, մի խումբ անձինք՝ նրանց թվում «Թաթ» մականունով հայտնի Արթուր Վարդանյանը, ով Ծառուկյանի մոտ աշխատել է որպես անվտանգության աշխատակից, եւ «Բարեց Վահրամը» զինված, տարբեր մեքենաներով ուղեւորվել են այնտեղ։ Վիճաբանությունը վերածվել է զինված բախման, հնչել են կրակոցներ։ Արդյունքում՝ վիրավորվել է 8 անձ, որոնցից մեկը՝ Մելիք Մանուկյանի զարմիկի ընկերը, ստացած վնասվածքներից մահացել էր հիվանդանոցի ճանապարհին, ազգականը՝ 21-ամյա Ջիվան Հարությունյանը, գլխի շրջանում հրազենային վնասվածքով տեղափոխվել բժշկական կենտրոն, իսկ փետրվարի 10-ին արձանագրվել էր նրա մահը։ Վիրավորների թվում են նաեւ Մանուկյանի զարմիկները, տուժածներից միայն 2-ն են Ծառուկյանի կողմնակիցները։

Գործով հարցաքննվել է նաեւ Ծառուկյանի որդին։ Ըստ շրջանառվող վարկածի` նախքան զինված հարձակումը ավտոտեխսպասարկման կետի պատասխանատուները նախ խոսել են նրա հետ:

Դեպքի առթիվ հարուցվել էր քրեական գործ՝ ՀՀ քրեական օրենսգրքի 104-րդ հոդվածի 2-րդ մասի 6-րդ, 7-րդ, 10-րդ կետերի (սպանություն, որը կատարվել է շատերի կյանքի համար վտանգավոր եղանակով, մի խումբ անձանց կամ կազմակերպված խմբի կողմից, խուլիգանական դրդումներով), 34-104-րդ հոդվածի 2-րդ մասի 1-ին, 6-րդ, 7-րդ, 10-րդ կետերի (սպանության փորձ), 235-րդ հոդվածի 1-ին մասի (ապօրինի կերպով զենք-զինամթերք ձեռք բերելը կրելը կամ փոխադրելը) եւ 258-րդ հոդվածի 4-րդ մասի հատկանիշներով (խուլիգանություն, որը կատարվել է զենքի գործադրմամբ):

Աղբյուր` Փաստինֆո