Փաստ ինֆո

ՀՀ վարչապետ Նիկոլ Փաշինյանի գնահատմամբ՝ Հայաստանում տեղի ունեցած հեղափոխությունը նպատակին ծառայած կհամարվի, եթե ձերբազատվենք մեքենաների ջարդոններից։

«Ես կհամարեմ, որ հեղափոխությունը Հայաստանում հասել է իր նպատակին, երբ մենք մեքենաների ջարդոններից և ժանգոտ կրպակներից ազատվենք», - շաբաթօրյակի ընթացքում պատասխանելով լրագրողների հարցերին հայտարարել է վարչապետը։

Նրա խոսքերով՝ Հայաստանը կարիք ունի աղբի վերամշակման կոմբինատի։ «Հիմա աշխատանքային խումբ է աշխատում։ Ունենք երկու հարց։ Ռեսուրսները պետք է հետազոտվեն, իսկ հետազոտությունը հասել է հետևյալ երկընտրանքին՝ մեզ աղբի վերամշակման կոմբինա՞տ է պետք, թե շեշտը պետք է դնել բիոէներգետիկայի վրա»,- նշեց Նիկոլ Փաշինյանը՝ ավելացնելով, որ սա ոչ թե քաղաքական որոշման խնդիր է, այլ աղբի կառուցվածքը պետք է ուսումնասիրեն մասնագետները և ասեն՝ որ տարբերակն արդյունավետ կլինի։

Ինչ վերաբերում է Սանիթեքի աշխատանքին՝ վարչապետն ասաց, որ վատ ղ գնահատում։

«Բայց եթե այս պահին ասենք՝ «Սանիթեք, դու վատ ես աշխատում, այլևս չպետք է աշխատես», աղբը քաղաքում դրանից քչանալո՞ւ է, թե շատանալու է։ Քաղաքապետը չպետք է այնպիսի լուծում տա, որ Երևանը հայտնվի կրկնակի, եռակի աղբի տակ։ Սանիթեքը պետք է հասկանա, որ մրցակցության մեջ կամ պետք է լավ աշխատի, կամ դուրս մղվի։ Այսօր ինքը մենաշնորհ է։ Այլ օպերատորը մեկ օրում չի լինի, մի քանի ամիս է պետք։ Աղբից ելք կա, հիմա հենց դա ենք ցույց տալիս», - ասաց Փաշինյանը։

Աղբյուր` Փաստինֆո