Փաստ ինֆո

Էպիստոլյար ժանրը մեր իրականության մեջ կարծես ծաղկում է ապրում, հատկապես այն անձանց մոտ, որոնք իրենց գրածը բարձրաձայն արտաբերել չեն կարող: Այդ մարդկանց շարքում է հույժ կասկածելի անցյալ ունեցող Վահան Շիրխանյանը:

Հենց սկզբից ասեմ՝ Քոչարյանին ներկայացվող մեղադրանքներին չէ, որ ուզում ենք անդրադառնալ: Դրան ՀՀ երկրորդ նախագահն ինքը կանդրադառնա, կարծում եմ, իր պաշտպանները կանդրադառնան, եթե ասելիք ունեն կամ հարկ համարեն:

ԱԱԾ պետ Արթուր Վանեցյանը խորհրդարանում հայտարարեց, որ գլխավոր դատախազությունը Վահան Շիրխանյանի՝ նամակը ուղարկել է ԱԱԾ եւ ՀՔԾ՝ ուսումնասիրության: Կարծում ենք, ԱԱԾ ղեկավարը Շիրխանյանի նամակին զուգահեռ կարևոր է, որ ուշադրություն դարձնի և factor.am-ի հետ Ավետիք Իշխանյանի հարցազրույցին, և Շիրխանյանի բաց նամակին իր ՖԲ էջում անդրադարձած Գերագույն խորհրդի պատգամավոր, Մեղրու և Կապանի շրջաններում արտակարգ դրության պարետ և ՀՀ նախագահի լիազոր ներկայացուցիչ Ալբերտ Բաղդասարյանի խոսքին։ Մանավանդ, վերջինս իր ՖԲ գրառման մեջ հստակ ասում է, որ ինքը ներկա է եղել հոկտեմբերի 27-ի հաջորդ օրը ՊՆ-ում, ՀՀ նախկին պաշտպանության փոխնախարար (նաև ԵԿՄ փոխնախարար) Աստվածատուր Պետրոսյանի առանձնասենյակում կայացած հավաքին:

Ավետիք Իշխանյանը վերը նշված հարցազրույցում հայտարարել է. «Ես համոզված եմ, որ այդ նամակի բովանդակությունը, եթե չասենք 100 տոկոսով, 99 տոկոսով ուղղակի սուտ է»:

Նա նշել է նաև, որ չի պատկերացնում, թե՝ «Վահան Շիրխանյանն այն ժամանակ այդպես հերոսաբար խոսացած լինի Ռոբերտ Քոչարյանի հետ: Շարունակելով՝ «Եվ ամենակարևոր հարցերից մեկը գիտե՞ք որն է, նույնիսկ կարևոր չէ՝ ինչ են ասում, կարևոր է՝ ով է ասում: Արդյո՞ք այնպիսի մարդիկ, ինչպիսիք են Վահան Շիրխանյանը, Գագիկ Ջհանգիրյանը, Մուշեղ Սաղաթելյանը և այլոք, իրավունք ունեն ընդհանրապես խոսել արդարության մասին և ինչ-որ մեկին քննադատեն, երբ Հայաստանի ամբողջ քաղաքական, ընտրական համակարգի և տարբեր տիպի անօրինականությունների, հանցագործությունների հիմնադիրներն են նաև իրենք եղել»:

Ի դեպ, նշված անձանցից Մուշեղ Սաղաթելյանն ու Վահան Շիրխանյանը այդ օրվա պաշտոնաբաժանության հավաքույթի սեղանի շուրջ հիմնավորապես նստած անձանցից են եղել: Ժամանակի մամուլը նույնիսկ սեղանի շուրջ ըստ զբաղեցրած տեղերի ու դերակատարության է անդրադարձել ,,ժանտախտի ժամին խրախճանք,, հիշեցնող այդ օրվա անցուդարձին:

Մինչ 20 տարվա վաղեմության խորհրդավոր խորհրդակցության մասնակիցներին ըստ արխիվային նյութերի անդրադառնալը, կարծում ենք հարկ է, որ մեջբերենք Ալբերտ Բաղդասարյանի ֆեյսբուքյան հրապարակման որոշ հատվածներ:
Նրա կարծիքով՝ «Վահան Շիրխանյանը սրբի թևեր հագած, բաց նամակ է գրում: Մարդ, որի կենսագրությունը, սկսած սովետական միլիցա, Աշտարակի ՀՀՇ նախագահ, ու հետո՝ որպես ԼՏՊ-ի, այնուհետ Վազգեն Սարգսյանի կամակատար, էնքան մութ էջեր, հատկապես նաև ռուսական հատուկ ծառայությունների հետ գործակցության մասով էնքան բաց նամակի նյութեր ունի, որ հանկարծ ինքն անկեղծորեն մի բաց նամակ էլ իրեն գրի, ՌՔ-ին ուղղված նամակում նրա խոսքերին անկեղծորեն հավատացողներն ու դրանց վրա հենվողներն իրենց աշխարհի վերջին միամիտ, հարիֆ, հիմարացածները կզգան»:

Ալբերտ Բաղդասարյանի համոզմամբ՝ Շիրխանյանն այսպիսով՝ «Ճշտախառը սուտ ցուցմունք է տալիս: Մոլորեցնում է: …Չի պատմում, թե ինչպես Վազգեն Սարգսյանի դին դեռևս չսառած, ինքն ու Անդրանիկ Քոչարյանը ՊՆ-ում կազմակերպել էին հավաք ու պաշտոններ էին բաժանում: Իրար մեջ էլ պայքարում էին վարչապետի աթոռի համար:

Շատերն էին ներկա: Նաև անձամբ ինքս:

Ու բոլորը կամ լռում են, կամ բարձրաձայն կեղծում:

Այդ մասին բարձրաձայնել եմ ժամանակին: Սա թող պատմի, թե ում հանձնարարությամբ էր ինքն ուզում Հայաստանում քաոս սերմանել և ինչ նպատակով: Ու մեռածներին վկա բերող մարդուց զզվելի ու ստոր արարած չկա»:

Իսկ ինչ են պատմում արխիվային նյութերը: Պատմում են, որ այդ հավաքին խորհրդարանական ուժերից մի կարճ ժամանակ ներկա է եղել ՀԿԿ առաջին քարտուղար, վաղամեռիկ Սերգեյ Բադալյանը, Ազգային առաջադիմություն կուսակցության ղեկավար Ալբերտ Բաղդասարյանն էլ իր ներկայությունը թյուրիմացություն համարելով այդ հավաքին, հեռացել է, հայտարարելով, որ ներկա անձանց և նրանց գործողությունների հետ գործ չունի:

Իսկ Աստվածատուր Պետրոսյանի երկար սեղանի շուրջ այդ օրը չափազանց ակտիվ են եղել այն ժամանակ՝ ՀՀ վարչապետի խորհրդական Անդրանիկ Քոչարյանն ու Վահան Շիրխանյանը, Մանվել Գրիգորյանն ու Սեյրան Սարոյանը, Գագիկ Գևորգյանն /Մատ Գագո/ ու Մովսես Գեղանգուլյանը /վարչապետի թիկնազորի ղեկավար/: Հետաքրքիր է, որ Աստվածատուր Պետրոսյանի փոխնախարարական աթոռը զբաղեցրել է գաղութների վարչության պետ Մուշեղ Սաղաթելյանը, իսկ աջ ու ձախ կողմերում բազմել են ՀՀՇ-ն և նրանից սերվածները:Վանո Սիրադեղյանը գրագրի դեր է կատարել՝ իր ձեռքով գրելով հավաքի մասնակիցների ցանկը, և համալրումների մասին զեկուցելով Անդրանիկ Քոչարյանին, որն ինչպես այսօր, այն օրերին էլ իրեն զգացել է ձուկը՝ ջրում: Ինչպես այս օրերին, այն օրն էլ՝ ազատ գրաֆիկով ելումուտ է արել անհատ գործիչ՝ Վահագն Խաչատրյանը: Իսկ հավաքի միակ կինը եղել է Շամիրամի Շողերը: Նույն ինքը՝ Շողեր Մաթևոսյանը:

Նրանք, որ իրենց Վազգենի մերձավորներ են հորջորջում, Վազգենի մահից մեկ օր հետո մեջ-մեջ էին անում երկիրն ու իշխանությունը:

Խորհրդակցության նշված լուսանկարը հրապարակվել է մամուլում՝ 1999 թվականի նոյեմբերին։

Հեղինակ` Արթուր Գահնապետյան