Փաստ ինֆո

Հանրային հեռուստաընկերության լուրերի թողարկման լրագրողներ Սիրանույշ Մուրադյանի եւ Լիանա Կարապետյանի՝ ընդդեմ հեռուստաընկերության հայցը վարույթ ընդունելուց հետո Վարչական դատարանը միջանկյալ որոշում է կայացրել։ Այս մասին «Փաստինֆո»-ն տեղեկացավ Սիրանույշ Մուրադյանից. «Մենք Վարչական դատարանից ստացել ենք մի որոշում, ըստ որի՝ վիճարկման հայցի վարույթ ընդունելը կասեցնում է վիճարկվող վարչական ակտի կատարումը մինչեւ գործն ըստ էության լուծող դատական ակտի օրինական ուժի մեջ մտնելը»,-ասում է Սիրանույշը։

Նշենք, որ Մուրադյանն ու Կարապետյանը աշխատանքից ազատվելու մասին ծանուցվել են 2019 թվականի հունվարի 11-ին։ Համաձայն այդ ծանուցման՝ նրանք աշխատանքից ազատվում են Հանրային հեռուստառադիոխորհրդի՝ դեկտեմբերի 25-ի որոշմամբ՝ հաստիքի կրճատման պատճառով։ Ծանուցումից հետո պայմանագիրը կասեցվելու էր մարտի 1-ից։  Դատարանի միջանկյալ որոշումը կայացվել է փետրվարի 22-ին. «Ըստ այս միջանկյալ որոշման՝ մեզ չպետք է ազատեին աշխատանքից, մինչեւ որ դատական գործը լուծում ստանար։ Բայց, փաստորեն, օրենքն այստեղ էլ են կոպտորեն խախտել, ու պայմանագիրը լուծել»,-ասում է Սիրանույշը։

Սիրանույշ Մուրադյանի խոսքով՝ կրճատման մասին իրեն առաջին անգամ ամռանն են տեղեկացրել, եւ նույնիսկ՝ ծանուցել։ Ինքն ընդդիմացել է՝ ասելով, որ կամայականության մասին բաց նամակով կտեղեկացնի Նիկոլ Փաշինյանին։ Դրանից հետո որպես խորհրդարանական լրագրող շարունակել է աշխատել։ Հետո՝ արդեն հունվարին, հինգ լրագրողներով տեղեկացվել են, որ աշխատանքային պայմանագիրը լուծվում է։ «Մեզ ծանուցել են, որ Հանրային հեռուստառադիոխորհրդի դեկտեմբերի 25-ի որոշմամբ՝ մեր հաստիքները կրճատվում են, բայց թե ինչ հիմքով, ինչու, ինչպիսի ընտրությամբ, հիմնավորված չի եղել։ Ահա այս որոշումն ենք մենք վիճարկում դատարանում։ Որոշումը ապօրինի է, չհիմնավորված ու կամայական»,-պնդում են լրագրողները։

Սիրանույշն ասում է, որ Հանրայինի լրատվական ծառայության նորանշանակ տնօրեն Պետրոս Ղազարյանը որոշումը հիմնավորել է՝ ասելով «կրճատվում եք, որովհետեւ հին եք». «Իսկ երկու օր առաջ՝ մի հարցազրույցի ժամանակ, նա եթերից հայտարարել է, թե ով է ասել, որ մասնավոր լրատվամիջոցից լրագրողին կարելի է դուրս շպրտել, իսկ հանրայինից՝ ոչ»,-նշում է Սիրանույշը։

Սիրանույշն ու Լիանան պնդում են՝ ըստ դատական միջանկյալ որոշման՝ պետք է շարունակեին նույն պայմաններով աշխատել մինչ պայմանագրի լուծման ժամկետը, տվյալ դեպքում՝ մարտի 1-ը։ Միաժամանակ նրանց պետք է ազատ թողնեին օրական աշխատաժամի 10 տոկոսի չափով՝ նոր աշխատանք գտնելու համար. «Մեզ մեկուսացրին մեր գործընկերներից, զրկեցին աշխատանքային սեղանից եւ համակարգչից, արգելեցին առավոտյան ժողովներին մասնակցել եւ արգելափակեցին լրահոսի էլեկտրոնային փոստը, բայց այս ամենի իրավունքը չունեին»,-ասում են լրագրողները՝ նշելով, որ նախքան պայմանագրի լուծման ժամկետի լրանալը լրատվականը սկսել է համալրվել նոր լրագրողներով։

Լրագրողների հայցը Վարչական դատարանը վարույթ է ընդունել, եւ 1-ին դատական նիստը նշանակվել է ապրիլի 30-ին։

Հիշեցնենք, որ հունվարին հայտնի դարձավ, որ Հանրային հեռուստաընկերության 5 լրագրողներ ազատվում են աշխատանքից։ Նրանցից  երկուսը՝ Լիանա Կարապետյանը եւ Սիրանույշ Մուրադյանը, դիմեցին դատարան՝ բողոքարկելով Հանրային հեռուստառադիոխորհրդի այդ որոշումը։

Հեղինակ` Միլենա Խաչիկյան