Փաստ ինֆո

Ոստիկանապետ Վալերիյ Օսիպյանը հանդիպել է  «Politik.am» կայքի գլխավոր խմբագիր Բորիս Մուրազիի հետ, ով հայտարարել է, որ ոստիկանապետը փորձում է ներազդել իր աշխատանքի վրա: Այս մասին այսօր  «Փաստինֆո»-ին հայտնեցին ոստիկանության մամլո ծառայությունից:

Նույն աղբյուրից «Փաստինֆո»-ին նաև տեղեկացրեցին, որ ֆեյսբուքյան «ֆեյքերի» կողմից խմբագրի և նրա ընտանիքի անդամների հասցեին հնչեցված սպառնալիքներ պարունակող գրառումները ուսումնասիրվում են ոստիկանության կողմից:

Բորիս Մուրազին, «Փաստինֆո»-ի թղթակցի հետ զրույցում մեկնաբանելով իր և ոստիկանապետի հանդիպումը, պնդեց իր այն համոզումը, որ «ֆեյքերով» իրեն սպառանցողները սպասարկում են ոստիկանությանը: Այդ մասին խմբագիրն ասել է նաեւ ոստիկանապետին՝   հանդիպման ժամանակ, ինչին վերջինս պատասխանել է, որ այդ հարցում վստահ չէ: Վալերիյ Օսիպյանը Բորիս Մուրազիին  վստահեցրել է, որ օրենքի և իր լիազորությունների շրջանակներում կանի հնարավորինս ֆեյքերի ինքնությունը բացահայտելու համար:

Բորիս Մուրազին նշեց, որ ունի բոլոր ապացույցները ֆեյքերի՝ ոստիկանության համար ծառայելու մասին:

Մեր այն հարցին, թե Վալերի Օսիպյանի կողմից կրկին եղել՞ է խոսակցություն իր վերաբերյալ հրապարակումը կայքից հեռացնելու մասին՝ գլխավոր խմբագիրը բացասական պատասխան տվեց։ «Նման խոսակցություն չէր կարող լինել, որովհետև երեկվանից հետո տրամադրվածությունն այնպիսին չէր, որ կարող էին ինձ նման բան առաջարկել»:

Հիշեցնենք, որ  Բորիս Մուրազին նախօրեին «Փաստինֆո»-ի հետ զրույցի ընթացքում հայտնել էր, որ  ՀՀ ոստիկանապետ Վալերիյ Օսիպյանը  կեսգիշերին զանգահարել է  իրեն եւ պահանջել է հեռացնել «Politik.am» կայքում իր վերաբերյալ կատարված հրապարկումը, ինչին հաջորդել են ֆեյսբուքյան «ֆեյքերի» կողմից խմբագրի եւ նրա ընտանիքի անդամների հասցեին հնչեցված սպառնալիքները: Կատարվածը գլխավոր խմբագիրթ գնահատել էր որպես մամուլի նկատմամբ ճնշում՝ հավելելով որ անգամ նախկին իշխանությունների ժամանակ նման բանի չի հանդիպել:

Հեղինակ` Գեւորգ Մողրովյան