Փաստ ինֆո

Տարածքային կառավարման եւ զարգացման նախարար Սուրեն Պապիկյանը այսօրվա ասուլիսի ժամանակ հայտնել է, որ կառավարությունը սկսում է ուսումնասիրություն, որի նպատակն է պարզել ՀՀ-ում աղբի մորֆոլոգիական կառուցվածքն ու տարեկան քանակը. «Ուսումնասիրությունը կատարելու է բրիտանական մի ընկերություն, եւ դրա արդյունքներից ելնելով՝ մենք կարողանալու ենք աղբահանության ոլորտում ներդրումներ անել ցանկացողներին ներկայացնել իրական պատկերը»։

Պապիկյանի խոսքով՝ այսօր ՀՀ-ում կա 339 աղբանոց, որոնքից ոչ մեկը չի համապատասխանում միջազգային ստանդարտներին. «Սրանք լոկալ աղբանոցներ են, հաճախ՝ փորված համայնքապետի հայեցողությամբ։ Ունենք նաեւ սովորույթով հաստատված աղբանոցներ, ինչպես, օրինակ, մոտակա ձորակն է կամ հեռու գտնվող այն վայրը, ուր կարելի է աղբը թաքցնել։ Մենք պետք է սա բերենք ստանդարտացման, պետք է ունենանք փակ աղբանոցներ, ինչը, իհարկե, ավելի երկարատեւ գործընթաց է»։

Նշենք նաեւ, որ մարտի 23-ին նախատեսված է անցկացնել համապետական շաբաթօրյակ, որի ժամանակ կկիրառվեն պետական մի շարք կազմակերպությունների իրավասության տակ գտնվող տեխնիկական միջոցներ. «Կգործարկվի շուրջ 1700 միավոր տեխնիկա, կփակվեն 6 աղբանոցներ եւ 477 աղբակույտեր, որոնք այսօր առկա են Հայաստանում»։

Պապիկյանի կարծիքով՝ երբ ասվում է, որ աղբահանության ոլորտում շատ բան կփոխվի, պետք է հասկանալ, որ քաղաքացին իրական պահանջատեր եւ իրավատեր է այն պարագայում, երբ Հայաստանի յուրաքանչյուր անկյունի նկատմամբ ունի համապատասխան հոգածություն։

Աղբյուր` Փաստինֆո