Փաստ ինֆո

Ղազախստանի նախագահ Նորսուլթան Նազարբաևը հայտարարել է հրաժարականի մասին։

«Ես որոշել եմ դադարեցնել իմ լիազորությունները նախագահի պաշտոնում», -հայտարարել է Նազարբաևը՝ այսօր ելույթ ունենալով երկրի հանրային հեռուստաընկերությունների եթերում։

Նա ասել է, որ լրանում է իր պաշտոնավարման 30-ամյակը։

«Որոշում եմ կայացրել որպես նախագահ իմ լիազորությունները վայր դնելու մասին։ Այս տարի լրանում է 30 տարին, ինչ ես զբաղեցնում եմ այս բարձր պաշտոնը։ Ժողովուրդն ինձ հնարավորություն տվեց լինել անկախ Ղազախստանի առաջին նախագահը»,- ասել է Նազարբաևը՝ պետական հեռուստաալիքներով հանրությանն ուղղված իր ելույթի ընթացքում։ 

Նշենք, որր ԽՍՀՄ-ի փլուզումից հետո՝ վերջին 30 տարիներին Նազարբաեւը եղել է Ղազախստանի միակ ղեկավարը։

Ղազախստանի սահմանադրության համաձայն՝ երկրի նախագահի՝ ժամկետից շուտ պաշտոնից հեռանալու դեպքում նախագահի լիազորությունները մնացած ժամկետում իր վրա է վերցնում խորհրդարանի սենատի ղեկավարը։ Ներկայումս Քասիմ- Ժոմարտ Տոկաևը ժամանակավորապես իր վրա է վերցրել նախագահի լիազորությունները:

Նազարբաևը կշարունակի մնալ անվտանգության խորհրդի անդամ և ղեկավար, կգլխավորի «Նուր օթան» կուսակցությունը:  

Նշենք, որ վերջին շրջանում Ղազախստանում եւս նկատվում էր ժողովրդական դժգոհության ալիքի ուժգնացում։

Աղբյուր` Փաստինֆո