Փաստ ինֆո

Երեւան քաղաքի ընդհանուր իրավասության դատարանում րոպեներ առաջ մեկնարկեց ՀՀ երկրորդ նախագահ Ռոբերտ Քոչարյանի կալանավորման ժամկետը երկարացնելու մասին նիստը, որի ընթացքում դատարանը կհայտնի իր որոշման մասին:

Նիստը տեղի է ունենում դատավոր Արմեն Բեկթաշյանի նախագահությամբ:

Պաշտպան Արամ Օրբելյանի փոխանցմամբ` Քոչարյանը ամենայն հավանականությամբ նիստին ներկա է լինելու:

Նիստից առաջ` լրագրողների հետ ճեպազրույցում, պաշտպանը նշեց, որ իրենք այսօրվա նիստից դրական սպասելիքներ ունեն. «Ինչպես երեկվա, այդպես էլ նախորդ բոլոր նիստերը ցույց են տվել, որ առկա են հիմքեր, որպեսզի գործն առհասարակ չշարունակվի»:

Օրբելյանի խոսքով` իրենք ներկայացրել են կալանքը գրավով փոխարինելու միջնորդություն. «Գումարի չափ չենք նշել, բայց խնդրել ենք դատարանին հաշվի առնել մի շարք հանգամանքներ, այդ թվում և այն, որ Քոչարյանի բանկային հաշիվները արգելանքի տակ են»:

Օրբելյանը նշեց նաև, որ անկախ գործի արդյունքներից` արդեն ունեն 4 բողոք, որ քննվելու են ՄԻԵԴ-ում. «Դրանք վերաբերում են արդեն իսկ կատարված խախտումներին»:

Հիշեցնենք, որ 18.01.2019թ.-ին առաջին ատյանի դատարանի որոշմամբ բավարարվել էր Հատուկ քննչական ծառայության քննիչի միջնորդությունը՝ Ռոբերտ Քոչարյանին կալանքի տակ պահելու ժամկետը երկարացնելու վերաբերյալ:

Դատարանի հիշյալ որոշման դեմ պաշտպանական խումբը վերաքննիչ բողոք էր ներկայացրել, որը սակայն Վերաքննիչ դատարանի փետրվարի 7-ի որոշմամբ՝ մերժվել էր։

Փետրվարին հայտարարվել էր «Մարտի 1»-ի քրեական գործով Ռոբերտ Քոչարյանի եւ եւս երեք այլ պաշտոնյաների մասով նախաքննության ավարտի մասին։

Հեղինակ` Միլենա Խաչիկյան