Փաստ ինֆո

Երեկ և այսօր հետևում եմ օպերային հարակից այգու շուրջ ընթացող իրադարձություններին, այգու տարածքում տարբեր տարիների ընթացքում գոյացած սրճարանների ապամոնտաժման գործընթացին:

Մեկնարկը, անկեղծ ասած, հարիր չէր քաղաքային իշխանությանը: Տպավորությունս նույնն էր, ինչպես Նորքի զանգվածում իրականացված ինքնակամ կառույցի քանդման ժամանակ ունեցա: Մինչդեռ ամեն ինչ կարելի էր շատ քաղաքակիրթ կազմակերպել՝ օրենքի տառին հավատարիմ մնալով: Բայց չգիտես ինչու՝ քաղաքապետը կրկին նախընտրեց սև-սպիտակի, բանակների բաժանելու ճանապարհը: Երևի այդպես զգացողություններն ավելի սու՞ր են: Ի վերջո, օպերան սրճարաններից ազատագրելու պատմությունը նույնպես պիտի հեղափոխության դրոշի ներքո լիներ, այլ ոչ թե՝ օրենքի ու իրավունքի:

Այն, որ այս ժամանակը վաղ թե ուշ գալու էր, երկու կարծիք լինել չի կարող, քանի որ իսկապես, օպերայի շրջակայքը, աուրան պիտի օպերային հատկանշական լիներ, այնպես, ինչպես հղացել է Ալեքսանդր Թամանյանը:

Այդ սրճարանների վերաբերյալ գոյություն ունեցող «ժամանակավոր կառույց» ձևակերպումը՝ վկա: Հողը համայնքինն է, սեփականության իրավունքի ձևը՝ վարձակալական ու ենթավարձակալական, ինչը շեշտում է ժամանակավոր բնույթը: Բայց այդ ժամանակավոր կառույցների տերերի հետ քաղաքային իշխանությունը կոնկրետ պայմանագրեր ուներ, որոնք այսպես կոպտորեն շրջանցելը մեղմ ասած՝ առաջիկայում դատարանների հետ խնդիրներ ունենալ է նշանակում՝ իր տհաճ հետևանքներով հանդերձ:

Բայց, փաստորեն, քաղաքապետարանը գերադասեց շոուն: Հզոր տեխնիկայով շռնդալից քանդումներ, սրճարանատերերի գույքի վնասում, տեղերում աշխատող ջահել ու ահել մարդկանց հանդեպ արհամարհանք: Իսկ ինչ կա շոուներից, սևուսպիտակից այն կողմ:

Մեր ձեռքի տակ է սրճարաններից մեկի՝ «Ատլանտիս Գարդեն» ՍՊԸ-ի պայմանագրային ողջ փաթեթը՝ կնքված 2004 թվականին՝ 27 տարի ժամկետով: Որը, պարզվում է ենթավարձատու Կենտրոն-կանաչապատում ձեռնարկության կողմից կարող էր լուծվել, եթե ենթավարձակալը, այս դեպքում՝ «Ատլանտիս Գարդեն» ՍՊԸ-ն հողն օգտագործած լիներ ոչ նպատակային կամ խախտեր օգտագործման պայմանները, կամ էլ՝ 3 ամիս վարձավճարն ուշացներ: Այս պայմանները երբեք չեն խախտվել:

Այնուհանդերձ, այս տարվա փետրվարի 13-ին Երևանի քաղաքապետարանի անշարժ գույքի կառավարման վարչության պետ Ամյանի ստորագրությամբ վերը նշված ՍՊԸ տնօրեն Ս. Ավետիսյանը նամակ է ստանում՝ առ այն, որ Կենտրոն-կանաչապատում ՓԲԸ-ին տրված 2162.89 քմ հողատարածքի նկատմամբ ընկերության կառուցապատման իրավունքը դադարեցվել է: Միակողմանի դադարեցվել է։

Նամակում նշվում է, որ վարձակալական պայմանագրերի՝ վաղաժամկետ դադարեցման հետ ՀՀ քաղ օր 621 հ համաձայն դադարում են նաև դրան համապապատասխան կնքված ենթավարձակալական պայմանագրերը:

Քաղաքապետարանն այդպիսով հայտնում է, որ օպերային հարակից հատվածում կանաչապատման-բարեկարգման ծրագիր է իրականացնելու՝ առաջարկելով «Ատլանտիս Գարդեն» ՍՊԸ-ին ապամոնտաժել սրճարանը և ազատել զբաղեցրած տարածքը: Հետաքրքիր է, ինչու է քաղաքապետարանը խուսափել կոնկրետ ժամկետ նշելուց, փոխարենը՝ օգտագործելով  «ողջամիտ ժամկետ» բառակապակցությունը՝ հստակ ոչինչ չասող, լղոզված: Արդյո՞ք ոչ նրա համար, որ երբ-ինչ ուզեն՝ ոնց ուզեն անեն:

Ի դեպ, նշենք, որ քաղաքապետարանի սույն նամակը ակնհայտ հակասության մեջ է ՀՀ կառավարության 2003 թ. Մայիսի 15-ի N698 որոշման հետ, որը բնավ չեղյալ չի համարվել և ըստ որի կառավարությունը թույլատրել է Կենտրոն-կանաչապատում ընկերությանը՝ ենթավարձակալական հիմունքներով փոքր տարածքներ տրամադրել՝ մանկական խաղահրապարակներ կառուցելու, կանաչ զանգվածը պահպանելու-բարեկարգելու և ավելացնելու համատեքստում: Ավելին՝ պայմանագրով նախատեսված է, որ վաղաժամկետ դադարեցմանը նախորդող երեք ամսվա ընթացքում միջոցներ պետք է  ձեռնարկվեն ենթավարձակալած գույքի՝ ժամանակին, ենթավարձատուի գրավոր համաձայնությամբ, իր կողմից հողատարածքի վրա կատարված բարելավումները, ամրակցված անշարժ գույքը կողմերի միջեւ որոշվող պայմաններով ենթավարձատուին օտարելու համար։  Ինչ է քաղաքապետարանը չգիտեր այս պայմանագրերի մասին, թե պարզապես արհամարհում է կամ գուցե խախտումները կատարվել են գիտակցվա՞ծ։

Այն, որ «Ատլանտիս Գարդեն» ՍՊԸ-ն բոլոր անհրաժեշտ փաստաթղթերն ունի՝ պայմանագրից մինչև սեփականության վկայական, կադաստրային մարմնի կատարած չափումներով և այլն, նրան ակնհայտ կերպով թույլ է տալիս իր իրավունքները վիճարկել դատական կարգով:

ՍՊԸ-ի փաստաբանը, ի դեպ, զարմացած է, թե քաղաքային իշխանությունն իրավական առումով ինչու գրագետ չգտնվեց՝ ինքն իրեն գցելով կրակը: Ըստ նրա՝ վարչական հարկադրանք է կիրառվել, որն իրավական հիմքեր չունի: Ավելին, ցանկացած գործունեություն, որն իրականացնում է պետական, վարչական մարմինը կամ համայնքը, պիտի որոշումով լինի, մինչդեռ ականատեսը եղանք միայն վարչական ներգործության, քաղաքապետարանը որոշեց քանդել՝ քանդեց: Կամ՝ որտեղ էին քաղաքապետարանի համապատասխան վարչությունները, քաղաքաշինության և հողի վերահսկողության վարչությունն ուր էր, չէ՞ որ դա հենց իրենց գործառույթն էր: Օպերայի հրապարակում միայն Կենտրոն վարչական շրջանի ղեկավարին տեսան մարդիկ, որն, այնտեղ գործառույթ չուներ, մեծ հաշվով:

Որպես արդյունք՝ ունեցանք շոու, մարդկանց լուրջ գույքային վնաս հասցվեց, կրքեր շիկացան, մարդիկ տուժեցին, ինչն, իհարկե անհետևանք չի մնա հատկապես ներդրումային դաշտի վրա:

Հեղինակ` Մարինե Մինասյան