Փաստ ինֆո

Դատարանի դահլիճում ասել ենք այն, ինչ պատրաստել էինք խոսելու՝ կապված հիմնավոր կասկածի, անձեռնմխելիության խնդրի, անվտանգության հարցերի, առաջադրված մեղադրանքի հետ, ներկայացված միջնորդության հետ, որը վերաբերում էր կալանավորման ժամկետը երկարացնելուն։ Այս մասին ՀՀ երկրորդ նախագահ Ռոբերտ Քոչարյանի կալանավորման ժամկետը երկարացնելու գործով այսօրվա դատական նիստից հետո ասաց փաստաբան Ռուբեն Սահակյանը։

«Ասում են՝ Պաշտպանության բանակը իրավունքն չունի խառնվելու ներքին հարցերին, անվտանգության հարցերը միայն սահմաններին պետք է լինեն։ Դա կատարյալ անգրագիտություն է։ Եթե այդպես ասում են, թող հղումներ կատարեն օրենքներին։ Մենք հղում ենք կատարում օրենքներին և ասում ենք՝ դա նաև ներքին հարց է։ Մենք ոչ թե միայն ներքին օրենքներին ենք հղում կատարում, այլ նաև՝ միջազգային փաստաթղթերին», - ասաց պաշտպանը՝ ավելացնելով «իսկ ո՞վ է ասում, որ բանակը մասնակցել է քաղաքական զարգացումներին»։

«Սասուն Խաչատրյա՞նն ասաց, քննչական մարմի՞նն ասաց։ Ես չեմ հավատում նրանց, նրանց ասածը ջուր է։ Ես ասում եմ՝ 0038 հրամանն իր մեջ որևէ հանցավոր բան չի պարունակում, դրա բացատրությունն ավելի լավ, քան տվել է Սեյրան Օհանյանը, ոչ ոք չի կարող տալ», - ասաց փաստանաբը։

Հարցին՝ ինչպես է վերաբերում ՀՔԾ պետ Սասուն Խաչատրյանի այն հայտարարությանը, որ Մարտի 1-ի գործողությունների ժամանակ զինվորներին վարձկանների էին վերածել, որոշ օլիգարխներ վճարում էին իրենց տները պահպանելու համար, Սահակյանը պատասխանեց՝ նման հայտարարություն կարող է անել մարդը, որը նենգափոխում է գործի փաստերը։

«Իրեն մի հավատացեք, նա սուտասան է, ահավոր սուտասան մարդ է։ Ես քրեական գործն եմ կարդում, նման բան չկա։ Գործը կարված է, հարցեր են տալիս, որոնք առնչություն չունեն գործին», - ասաց փաստաբանը։

Հիշեցնենք, որ 18.01.2019թ.-ին առաջին ատյանի դատարանի որոշմամբ բավարարվել էր Հատուկ քննչական ծառայության քննիչի միջնորդությունը՝ Ռոբերտ Քոչարյանին կալանավորումը եւս երկու ամիս երկարացնելու վերաբերյալ:

Դատարանի հիշյալ որոշման դեմ պաշտպանական խումբը վերաքննիչ բողոք էր ներկայացրել, որը սակայն Վերաքննիչ դատարանի փետրվարի 7-ի որոշմամբ՝ մերժվել էր։

Փետրվարին հայտարարվել էր «Մարտի 1»-ի քրեական գործով Ռոբերտ Քոչարյանի եւ եւս երեք այլ պաշտոնյաների մասով նախաքննության ավարտի մասին։

Այսօրվա նիստին մասնակցում է նաեւ Ռոբերտ Քոչարյանը, եւ, ինչպես նշեց Ռ.Սահակյանը, նախատեսվում է, որ նա եւս ելույթ կունենա։

Աղբյուր` Փաստինֆո